في مسلسل (تغيير جو) اللي بدأت أول حلقاته في النص التاني من رمضان، ظهرت الفنانة شيرين بشخصية عندها مشكلة إدمان مسكنات ومحجوزة في مصحة نفسية للعلاج، وجذب انتباه الناس نوع من العلاج اللي بيستخدم في المصحة هو (السيكودراما).
إيه هي السيكودراما؟ هو أسلوب في العلاج النفسي طوره الطبيب جاكوب ليفي مورينو سنة 1911، وفيه بيتحط المريض في مساحة علاجية (مصحة) بعيدة عن بيئته الطبيعية (بيته مثلًا)، علشان يقدر ينفصل عن البيئة اللي سببت له الاضطراب النفسي.
بتعتمد الطريقة دي في العلاج على جلسات جماعية مع المرضى، بيتكلموا فيها عن مشاكلهم واضطراباتهم بشكل يساعدهم يخرجوا برا ذاتهم، علشان ميتأثروش بالذكريات اللي بيحكوها بشكل عنيف.
بيوفر العلاج بالسيكودراما للمريض مساحة خيالية (مسرحية) يقدر فيها يتقمص شخصية مختلفة وسط مجموعة من الناس يوفروا له الدعم، وفي وجود الطبيب اللي بيوجه الجلسة.
مافيش فئة معينة من الناس بيناسبها العلاج بأسلوب السيكودراما أكتر من ناس تانية، وده لإن كلنا بنؤدي أدوار مختلفة في حياتنا، وضغط الأدوار دي ممكن يسبب لنا اضطراب، وعلشان كده بنحتاج نخرج برا دورنا الطبيعي ونواجه اضطراباتنا في سياق درامي.