خلال الفترة من 26 لـ 28 أبريل هتنطلق فعاليات الدورة التانية من مهرجان هوليوود للفيلم العربي، في سيتي ووك هوليوود، ونسخة السنة دي من المهرجان هتشهد حضور نخبة كبيرة من صناع السينما في العالم، وعروض لعدد من أفضل إنتاجات السينما.
وبيقام مهرجان هوليوود للفيلم العربي ضمن فعاليات الاحتفال بشهر التراث العربي الأمريكي، اللي بتبدأ في أبريل كل سنة، في المدينة اللي اسمها هو نفس اسم المهرجان.
وهدف المهرجان خلق مساحة جديدة لصناع الأفلام من المنطقة العربية وشمال إفريقيا، علشان يتقابلوا ويطوروا أفكاراهم وإبداعاتهم.
وبيعرف المهرجان صُناع السينما العالمية على صناعة السينما العربية، والحاجات اللي بتميزها وتخليها نوع متفرد من السينما العالمية.
وبيناقش المهرجان التحديات والمشاكل اللي بتواجهها السينما العربية والطرق اللي ممكن من خلالها نطورها، وبيحاول كمان يخلق منصة معرفية علشان يتعرف الجمهور الغربي على السينما العربية وصُناعها، ويتعرفوا من خلالها على قضايا المنطقة وثقافتها وهويتها.
بتحمل الدورة التانية من المهرجان اسم المخرج المصري محمد خان، وأعلن المهرجان عن تكريم المخرج الكبير خيري بشارة، بمنحه جايزة (إنجاز العمر لسنة 2023) خلال فعاليات المهرجان.