أعلن المذيع المصري يوسف الحسيني، إصابته بمتحور أوميكرون على الهواء مباشرةً من خلال برنامجه التلفزيوني “التاسعة”، اللي بيتذاع على القناة “الأولى” الفضائية. وقال الحسيني في بداية الحلقة: “من غير ما يكون عندنا قلق أنا غالبًا عندي أوميكرون، علشان كده ماقدرتش أحضر للبرنامج إمبارح”.
ووضح يوسف الحسيني إنه ظهر في الحلقة لإن الظروف حتمت عليه كده، رغم إحتمال إصابته بمتحور أوميكرون، وقال: “أنا جاي النهارده مخصوص علشان لازم يكون في تأبين للأستاذ الراحل وائل الإبراشي من داخل الأستوديو اللي بدأ فيه البرنامج ده”.
وكرس الحسيني الحلقة بالكامل لرثاء الإعلامي المصري وائل الإبراشي، اللي رحل عن عالمنا أول إمبارح بعد معاناته من تعقيدات صحية خطيرة على إثر إصابته بفيروس كورونا. وكان الإبراشي مر بظروف صحية سيئة جدًا بعد الإصابة بالفيروس اتسببت في تليف الرئة وحصلت تعقيدات صحية خطيرة ماقدرش الدكاترة يلحقوه منها.
وحكى الحسيني مقتطفات من حياته مع الإبراشي، تضمنت أجزاء من شغلهم مع بعض كأستاذ وتلميذ في الإعلام، وأثنى الحسيني على حب الإبراشي لشغله وتكريس حياته بالكامل إنه يطلع أحسن منتج من شغله طول الوقت.
وقال الحسيني: “لما تتعرف عليه تلاقيه إنسان واقف في ضهرك، وبيساعدك في الشغل وأنت عيل صغير مش فاهم حاجة، وهو مديرك مش مضطر يساعدك في حاجة، ولما أي حد فينا يعمل حلقة حلوة يكلمه ويثني على الشغل، وممكن يزود له معلومة أو مصدر، كيان وكتلة من الطيبة والجدعنة والذوق والأخلاق والاحترام والنشاط”.
وتابع: “لما تعب وائل الإبراشي واستلمت برنامج التاسعة مكانه لحين عودته، كان بينقل أخبار البرنامج ومقاطع الفيديو على صفحته، لإن عليها متابعين كتير، ولإن أنا ماعنديش صفحة، وكان بيساعدني على قد ما يقدر، لإن عنده ولاء وانتماء للفكرة وشغله، ومحبة حقيقية لأصحابه وزملائه”.
ومن الجدير بالذكر إن الإعلامي المصري الكبير وائل الإبراشي، اتوفى أول إمبارح عن عمر يناهز 58 سنة، بعد تعقد حالته الصحية إثر إصابته بفيروس الكورونا، اللي سبب له تليف في الرئة وتعقيدات صحية تانية كانت السبب في رحيله عن عالمنا.