مهرجان الأسكندرية السينمائي في دورته الـ 36، تم إلغاء حفل الافتتاح الخاص بيه، اللي كان من المقرر إقامته يوم السبت اللي فات، لكن تردد كلام كتير عن سبب الإلغاء وكتير قالوا إنه بسبب زيادة عدد الإصابات بفيروس كورونا في الوسط الفني بعد فعاليات مهرجان الجونة اللي تمت الأسبوع اللي فات، وإنه تم إلغاء حفل افتتاح المهرجان خوفًا من تكرار نفس السيناريو، لكن إدارة المهرجان طلعت بيان ووضحت سبب إلغاء الحفل رسميًا.
واتضح إن سبب إلغاء الحفل هو سوء الأحوال الجوية من أمطار وصلت لحد السيول في بعض المناطق، اللي حصلت في محافظة الأسكندرية من بداية الأسبوع ده، وتسببت في تعطيل الدراسة يوم السبت والأحد، فاضطرت إدارة المهرجان برئاسة الناقد السينمائي الأمير أباظة، لإلغاء حفل افتتاح المهرجان، لكن هيتم إقامة حفل الختام اللي هيتقدم فيها احتفالية سينما الأسكندرية يوم الخميس الجاي الساعة 7 مساءً.
وإدارة المهرجان كمان أكدت إن فعاليات المهرجان هتقام في مواعيدها، واللي بالفعل ابتدت من امبارح الأحد، والفعاليات هتكون بسينما رينسانس ومركز الحرية للإبداع واتيليه الأسكندرية، وهيتم تكريم فنانين على مدار فعاليات المهرجان، وندوات تكريم الفنانين هتقام في قاعة عزت العلايلي بفندق شيراتون المنتزه، والمهرجان بيقام مع الاحتفاظ بالإجراءات الاحترازية والالتزام بعدم إقامة أي أنشطة أو فعاليات في أماكن مغلقة، تنفيذًا لقرار مجلس الوزراء.
والدورة دي من المهرجان بتحمل اسم الفنان عزت العلايلي، تقديرًا لمشواره الفني الكبير اللي مليان بأعمال مهمة وكبيرة متعلقة في ذاكرتنا وفي تاريخ الفن المصري والعربي كله، في أعمال بتوثق أحداث تاريخية مهمة لمصر زيّ الطريق إلى إيلات، وأعمال بتساعد في ترسيخ مبادئ وقيم كتير بننتقدها في مجتمعنا في الوقت ده.