في المجتمع العربي، رياضات كتير بتكون محصورة بشكل خاص على الأولاد وبتتقفل أبوابها قدام البنات تحت حجج كتير منها إنه الرياضة دي عنيفة أكتر من اللازم أو مش بتتماشى مع تقاليد المجتمع. طريقة التفكير دي ضيعت أجيال من مواهب كان عندها شغف وفقدته مع كسر المقاديف المتواصل، لكن شوية شوية، الفكر ده بدأ يتغير، ودلوقتي بنشوف البنات بتدخل عالم الرياضة وبيصنعوا الفرصة لنفسهم؛ ده كمان في منهم اللي دخل الحجاب لعالم الرياضة وغيروها بشكل جذري.
واحدة من أوائل المحاربات دول كانت فهيمة فلكناز، اللي كانت شغوفة بالرياضة من صغرها، ولعبت لعب مختلفة من ألعاب القوى والسلة للطايرة وتنس الريشة، بس لظروف حالت عن إرادتها، إضطرت توقف. وتمر السنين و في 2017، قرر إنها تتدرب ملاكمة، وعلى الرغم من نظرة المجتمع اللي شايفه إن ده “عيب” أو”مينفعش”، خصوصًا وإن دي رياضة عنيفة، لكن هيّ تمسكت بشغفها وإتدربت وقوت مهاراتها، لحد ما وصلت إنها تمثل بلدها، الإمارات العربية المتحدة، في بطولات دولية.
في الأول فلكناز كانت بتتدرب مع مجموعة، لكن بعد ما لاحظت تطور مستواها عن بقية زملائها قررت إنها تشوف مدرب خاص، وبعدها قدرت توصل لكم كافي من الخبرة سمحلها بإنها تسافر وتلعب بإسم الإمارات.
ولما إتسألت في الإمارات اليوم عن رأيها في إن في رياضات معينة متنفعش للبنات قالت: “رياضة الملاكمة لا تنتقص من أنوثة المرأة شيئاً، بل تكسبها هيبة، وتمنحها القوة والثبات والاتزان من خلال التدريبات الجسدية والذهنية، فعندما ننظر إلى الطيور الصغيرة وكم هي لطيفة، لكنها إذا أحست بأن هناك خطراً يقترب من أبنائها تتحول العصفورة الأم إلى وحش هائج يهابه المهاجم”.
فلكناز شاركت في بطولة آسيا للملاكمة في شهر أبريل اللي فات في أبوظبي، وبعدها شاركت في البطولة الرمضانية للملاكمة اللي قدرت تحصل فيها على الميدالية الذهبية.
اللاعبة الشابة طموحة جدًا، ومش بس نفسها ترفع علم بلدها في المحافل الرياضية المختلفة بس كمان عاوزة تشجع بنات ونساء الإمارات إنهم يلعبوا الرياضة اللي بيحبوها أيًا كانت هي إيه.
أضافت: “كل من يشعر بأنه يمتلك المهارات الكافية لخوض تجربة الملاكمة، أن يمارسها ليس بغرض المتابعة المهنية، ولكن من أجل اللياقة البدنية، والعيش في حالة لا يوفرها أي نوع آخر من الرياضة من الانسجام الجسدي والروحي”.
حاليًا، هي بتقدم حصص ملاكمة للسيدات بس كل يوم سبت في صالة “Real Boxing Only” الرياضية في القوز في دبي، والحصة سعرها 100 درهم بس، وتقدروا تحجزوا من هنا.