رغم مرور أسبوعين على نهاية الدوري المصري، بس لسه الجدل والمشاحنات بين النادي الأهلي والزمالك موجودة، وأخرها كانت بسبب الإعلامي إبراهيم عيسى لما طلع في حلقة من برنامجه وانتقد شعار الأهلي “الأهلي فوق الجميع” ووصفه بإنه شعار نازي وتعبير استعلائي مقتبس من شعار “ألمانيا فوق الجميع”.. التصريحات دي اتقابلت بردود فعل من جمهور الفرقتين بين الحيادية والتعصب وتوضيح الموقف.
رد فعل جمهور الفرقتين بعد التصريح
جمهور الفرقتين فِضلوا على تويتر لمدة يومين كاملين في مشاحنات، في اللي قابل تعليق إبراهيم عيسى بالثناء والمدح وقال إنه كان بيشرح معنى المقولة وإن كان قصده إن الأهلي لازم يبقى فوق محبيه ومشجعيه بس، مش فوق كل النوادي التانية، وإلا كده هيبقى التعبير أشبه بتعبير نازي. وعملوا هاشتاج “إبراهيم عيسى قال الحق”.
ولكن في اللي هاجموا وقالوا إن إبراهيم عيسى كشف انحيازه لنادي الزمالك بتصريحه ده، ووضح أحد الإعلاميين الرياضيين وقال إن الأب الروحي للأهلي صالح سليم وهو اللي اختار الشعار ده وكان قصده إن مصلحة الأهلي بتيجي قبل مصلحتهم الشخصية، وإن كيان الأهلي فوق كل الأعضاء المرشحة علشان انتخابات النادي، وعمر ما كان الغرض من الشعار التعصب أو الاستعلاء.
السبب هو التعصب الكروي ولا تصريحات الإعلاميين اللي بتخلق مشاحنات؟
بعد نهاية كل بطولة، بيتفتح مجال واسع من التعليقات، في منها اللي بتتوصف بالعنصرية وفي اللي بيوصفها بالتعصب الكروي وفي ناس بتشارك فيها من باب التحفيل وخلق الميمز.
وفي ناس مش عاجبهم ده ولا ده وشايفين إن وتيرة التعصب الكروي في مصر بقت في أعلى مراحلها، وناس تانية شايفين إن التصريحات الإعلامية اللي بتطلع بتبقى هي السبب وإن المفروض الإعلاميين مايعلنوش عن انتمائهم الكروي ولا يبينوا انحيازهم لنادي على حساب التاني.. بين كل ردود الأفعال دي والمشاحنات، أنتم شايفين مين الصح فيهم؟