رغم خسارته امبارح قدام المنافس الكوري كاي هونج، بس لفت نظر كل الصحف العالمية زيّ “ديلي ميل” وبقى تريند بعد الماتش ده للأداء المشرف، إبراهيم حمدتو الاعب الوحيد في العالم اللي بيلعب تنس طاولة بـ”فمه” وبمساعدة “قدمه”، وأول لاعب مصري يظهر كشخصية أنيمي جنب الدمية سوميتي في مقطع ترويجي للعبة تنس الطاولة (فردي رجال).
المصري إبراهيم حمدتو يظهر في مقطع ترويجي للعبة تنس الطاولة في دورة الألعاب البارالمبية #طوكيو2020
— اليابان بالعربي🇯🇵#طوكيو2020🗼 (@nippon_ar) August 25, 2021
إبراهيم حمدتو يعتبر نموذج للعزيمة والإصرار، وملهم لناس كتيرة، مش بس علشان ظروفه الاستثنائية، لأ ده كمان بسبب الطريقة اللي بيلعب بيها واللي مليانة تحدي (بيمسك المضرب بفمه وبيرمي الكرة بقدمه علشان يوجه ضربات الإرسال)، لقطات مؤثرة أخدها المصورين له طول الماتش اللي انتهى بنتيجة 0-3.
بكلمة قالها حد من أصحاب حمدتو “خليك في حاجة تقدر تعملها” كانت بمثابة تحدي له إنه لازم يوصل لحاجة في اللعبة دي، مش بس لعبة للتسلية، فقعد يتدرب مع نفسه لمدة سنتين.
أما على مستوى الإنجازات فهو له تاريخ مشرف، لإنه جاب قبل كده الميدالية الفضية في بطولة أفريقيا لتنس الطاولة تلات مرات، في سنة 2011 و2013 و2015، وتعتبر دي تاني مشاركة له في الحدث الرياضي العالمي ده، وحصل على الميدالية الشرفية في بطولة أفريقيا للتنس 1991.
أما عن البعثة المصرية، فبتشارك بـ49 لاعب ولاعبة بـ8 ألعاب مختلفة وهي: رفع الأثقال والسباحة وتنس الطاولة وألعاب القوى والريشة الطائرة والباراتايكوندو وكرة الهدف للسيدات. وشوفنا في حفل الافتتاح رفع العلم المصري عن طريق الثنائي: فاطمة عمر بطلة رفع الأثقال وهشام صلاح لاعب منتخب الكرة الطايرة جلوس.