ممكن يكون أغرب خبر هتقراه النهارده، عن اللي وصلنا له في التقدم التكنولوجي وابتدى يتحقق على أرض الواقع مش مجرد إفيه بنقوله كده بيننا وبين بعض، أول فرح افتراضي في الميتافيرس اتعمل فعلًا في دبي، في وقت واحد في كذا بلد، يعني احنا خلاص عدينا مرحلة إن نكتب الكتاب بتوكيل والعريس والعروسة مش قاعدين مع بعض في نفس القعدة والعريس حاطط إيده في إيد وكيل العروسة والمشاهد اللي متعودين عليها دي لأ، توكيل إيه بقى خلاص هنتجوز أونلاين دلوقتي.
الموضوع ابتدى بإن للعروسين عايزين يجربوا الفكرة دي وازاي ممكن يعملوا فرح افتراضي، بعد ما عقدوا قرانهم في 2019، وخططوا لتنفيذ الفرح افتراضيًا.. والمعازيم كانوا حاضرين الفرح من كل أنحاء العالم، بما فييهم والد ووالدة العريس من فرنسا، ووالد ووالدة العروسة من باراجواي. الفرح كان فيه خواتم NFT، ولبس زفاف مصنوع من blockchain، والحفلة في نادي Amnesia Ibiza في Decentraland، واللي عرض كواليس الحفلة موقع “ذا ناشيونال”.
دي مش أول مرة نشوف حدث مهم وكبير بيتعمل أونلاين، خصوصًا من وقت انتشار فيروس كورونا والعالم كله اضطر يكون في عزل منزلي، ولما المدة طالت، حاولنا نرجع أنشطة مختلفة لحياتنا بس بتغيير طريقة التجمعات، وبقينا نعملها أونلاين، من أول الدراسة عن بعد والشغل من البيت والاجتماعات الأونلاين، لحد ما وصلنا بالتكنولوجيا والفكرة دي للحفلات، واتعملت حفلات موسيقية أونلاين، ومهرجانات سينمائية كمان تم إقامتها افتراضيًا.. فتقدر تتابع الحدث وانت في مكانك، وكإنك في قلب الحدث.
الموضوع تخطى فكرة “أونلاين” بس، اللي هو أبقى أشوفك وتشوفني بكاميرات الموبايل من أي مكان، لأ ده احنا هنتعامل بشخصيات افتراضية كمان في الميتافيرس.. التكنولوجيا بتتطور بشكل سريع ودايمًا بيفاجئنا كلنا، وبرضه لما تسمع عن الحاجة كده أو تتقال في قعدة، غير لما تشوفها بتتحقق قدام عينيك.
أول حدث كبير أبهرنا في الميتافيرس كان أسبوع الموضة، اللي شارك فيه أسماء وماركات عالمية في الموضة والأزياء، منهم Dolce & Gabbana، وشاركت فيه مصر كمان من خلال “سي إم ديزاينز” للمصممة المصرية كريستين المعصراني،
