الفترة الأخيرة قوة السوشيال ميديا أثبتت وجودها وقوتها في مساعدة كتير من أفراد المجتمع بطرق مختلفة. السوشيال ميديا قدرت تجيب لستات حقها من المتحرشين، وقدرت كمان توصل صوت الأشخاص المحتاجة للدعم والعلاج، علشان السلطات تعرف عنهم وتساعدهم. والحقيقة إن قوة السوشيال ميديا وسرعة اتخاذ الدولة لقرارات مهمة بخصوص القضايا دي، هى اللي خلت دلوقتي أم لطفل اسمه مصطفى، تعمل صفحة أنقذوا مصطفى، علشان تحاول توصل صوتها وتنقذ ابنها من المرض.
انتشر بشكل واسع على صفحات السوشيال ميديا منشور بخصوص طفل عنده 17 سنة اسمه مصطفى، بيعاني من مرض نادر اسمه “CIPO”. بيطلق عليه انسداد معوي زائف هو اضطراب حركي معدي معوي نادر وشديد وبيسبب العجز والشلل في الجهاز الهضمي. مصطفى تم استئصال قولونه ومحتاج لزرع جهاز هضمي مكون من خمس أعضاء منهم المعدة والأمعاء والطحال والبانكرياس. وبالتالي محتاج زرع كامل للجهاز الهضمي في أسرع وقت لإن حالته متأخرة.
وكمان هو على التغذية الوريدية حاليًا واللي حصل له منها حساسية وماينفعش ياخد محاليل لأن مرض السكر أثر على البنكرياس، وبالتالي بقى في خطورة أكبر على حياته، مصطفى بقى عنده درجة حرارة عالية تصل للـ 40 وبيصيبه إسهال اللي بيتسبب في فقدان أكبر للوزن وممكن تسبب مضاعفات للقلب.
مصطفى حاليًا وصل وزنه لـ 17 كيلو وبقى غير قادر على الحركة أو التوازن، وعلشان كده والدته بتحاول توصل صوتها علشان يتعالج مصطفى على نفقة الدولة ويقوم بالعملية بالخارج في أمريكا واللي هتكون تكليفتها 2 مليون دولار. سارع كتير من رواد السوشيال ميديت بإعادة نشر بوست أنقذوا مصطفى، أملًا في وصول الرسالة ومساعدة الطفل. بنتمنى لمصطفى الشفاء العاجل وإنه يقدر يسافر ويقوم بالعملية، علشان يرجع لحياته الطبيعية بصحة وسلامة.