مين فينا وأنا أولهم عايز يرجع زمان ويقول للزمان ارجع يا زمان ويعيش مع نجوم الزمن الجميل وسط حكاويهم وحواديتهم وروقانهم وجمالهم وشياكتهم؟ يركب آلة الزمن ويروح للحتة اللي عايزها، ويا سلام لو الآلة دي ودتنا لأفلام زمان وأجواءها. الأفلام والسينما زمان كانت لها طابعها الخاص اللي ماتكررش من ساعتها، وفي محاولات لحد دلوقتي إن الناس ترجع الأجواء دي في الأفلام اللي بتتعمل حاليًا وفي محاولات بتنجح وفي محاولات بتفشل، بس يظل زمان ونجوم زمان مختلفين، ومن ضمن الحاجات اللي بنعملها علشان نحس إننا عايشيين في الوقت ده، إننا نتخيل نفسنا لو كنا قاعدين معاهم حالنا هيبقى عامل إيه وهنكون بنتكلم ونحكي في إيه.
ولما كنا نحب نسرح بخيالنا أوي كنا نتخيل نفسنا مكان الممثلين دول، ولحد دلوقتي ماحدش يعرف يحطهم في مقارنة مع أي جيل بعدهم، هما في حتة لوحدهم كده متفردين، بس النهارده هنلعب لعبة صغيرة معاكم وناخدكم عبر الزمن ده ونعيشكم في أجواء من النوستالجيا، وتتخيل كده لو كنت عايز في زمنهم، كان مين هيبقى أقرب شخصية ليك فيهم؟