كلنا عارفين مهرجان القاهرة السينمائي الدولي ومكانته بين المهرجانات السينمائية مش بس في الشرق الأوسط وشمال أفريقيا، لكن كمان في العالم كله. كل دورة للمهرجان بتكون مختلفة ومبهرة أكتر من اللي قبلها، والدورة 44 مش هتكون أقل من كده، خصوصًا إن مدير المهرجان في الدورة دي هو المخرج الكبير، أمير رمسيس، بس مين هو أمير رمسيس وإيه أهم أعماله في السينما المصرية؟
المخرج
أمير رمسيس، مخرج ومخرج مساعد وكاتب سيناريو من مواليد 11 أكتوبر 1979، اتخرج من المعهد العالي للسينما سنة 2000، بدأ حياته المهنية كمخرج مساعد للمخرج العالمي، يوسف شاهين، لمدة خمس سنين، وانطلق بعدها للإخراج. أفلامه رغم إنها قليلة في العدد نسبياً، لكن معناها وقيمتها الفنية خلدت اسمه بين المخرجيين المصريين، والإنجازات اللي أفلامه حققتها بتأكد ده. فيلمه “عن يهود مصر” اتعرض في أكتر من مهرجان دولي زي بالم سبرينجز، مونتريال، وهامبورج. وشارك في مهرجان دبي السينمائي، ده غير إن واحد من أهم أعماله هو “حظر تجول” اللي شارك في مهرجان شينغهاي السينمائي.
غير أعماله الفنية، أمير أبدع في أعماله الإدارية كمدير فني لمهرجان الجونة السينمائي لخمس دورات متتالية، ده غير عمله كعضو لجنة تحكيم في مهرجانات سينمائية مختلفة، زيّ مهرجان الإسكندرية للفيلم القصير، مهرجان الأقصر للفيلم الأفريقي، ومهرجان طرابلس الدولي.
المهرجان
أعلن الفنان، حسين فهمي، رئيس مهرجان القاهرة السينمائي الدولي لدورته ال44، من خلال بيان أصدرته إدارة المهرجان، إنه اختار المخرج أمير رمسيس كمدير للمهرجان. والبيان كان كالآتي “أسعدني جداً قبول صديقىي العزيز أمير رمسيس إدارة مهرجان القاهرة السينمائي الدولي لما له من خبرة في هذا المجال مع تمنياتي له بالنجاح”.
وحسب مجلة “سيدتي”، عبر المخرج عن قبوله للمنصب بالآتي “فخور بتكليف الفنان حسين فهمي لي بتولي تلك المسئولية الكبيرة وأتشرف بالعمل تحت إدارة رمز من رموز السينما المصرية، وأطمح أن أستمر في مسيرة الفريق السابق للمهرجان والذي كان له دور رائد في تطويره وأتمنى أن أكون جديرًا بهذا المنصب في المهرجان الأعرق والأهم في المنطقة العربية”
وكلام المخرج في محله لإن مهرجان القاهرة السينمائي يعتبر الوحيد في منطقة الشرق الأوسط وشمال أفريقيا اللي مُسجل ضمن فئة A في الاتحاد الدولي للمنتجين في باريس.
المتوقع
إيه الشكل المتوقع للدورة ال44 من المهرجان؟ وإيه المميز فيها أو العقبات اللي ممكن تواجه المخرج، أمير، في منصبه الجديد؟ في تصريحات خاصة لمصراوي، أمير قال “إنه اتفق مع الفنان حسين فهمي على التفكير في مواصلة ما قدم في الدورات السابقة خاصة وأنها كانت ناجحة للغاية، والمهرجان كان في حالة صعود مستمرة. الفريق السابق أنجز خطوات كبيرة، ونحن نرغب في البناء عليها، في النهاية نحن نحمل مسئولية اسم كبير”. وكمان وضح أهمية بداية التخطيط المبكرة للمهرجان وقال “نحن أمامنا نافذة زمنية قليلة مع كثير من التحديات، أهمها بالنسبة لي البرنامج”.
واضح إن في حاجات كتير محتاجة تتعمل علشان المهرجان يتم على أكمل وجه وأحسن صورة، وكل من عنده اهتمام بالسينما والوسط الفني متوقع دورة المهرجان تكون مكملة لنجاحات الدورات السابقة، بس بلمستها الخاصة اللي أكيد مدير المهرجان، أمير رمسيس، قادر يظهرها.