أمر من السحر: فيلم عن الابتزاز الإلكتروني بيركز على شعور الضحية

السوشيال ميديا منحتنا مساحة نقدر نتكلم فيها بحرية عن أزمة التعديات الجنسية على الآخرين، وبالذات البنات والستات اللي بيتعرضوا للتحرش والاعتداءات الجنسية بشكل متواصل، ولكن برغم المساحة الحرة اللي وفرتها السوشيال ميديا للناس علشان يتكلموا بحرية عن تجاربهم ويطالبوا بالتغيير، هي أثبتت نفسها كمان كمساحة يقدر يمارس عليها المتحرشين والمعتدين جرايمهم بحرية.

التعدي الجنسي على الآخر من خلال السوشيال ميديا مابقاش مجرد تحرش لفظي في الرسايل الخاصة، أو صور عريانة بتتبعت من غير ما حد يطلبها. لأ، التعديات دي أتحولت لجرايم مختلفة من الابتزاز والتهديد بتسريب صور خاصة، لفبركة صور واستخدامها في ابتزاز الناس ودفعهم لتصرفات متطرفة، زيّ الابتزاز اللي دفع بنت في طنطا للانتحار.

جريمة ابتزاز شخص وتهديده بتسريب صوره الخاصة أتقابلت بردود فعل مختلفة من الشارع المصري، ما بين ناس متعاطفة مع الضحايا اللي بتتسرب صورهم وناس بتهاجمهم، ولكن القضاء المصري أخد موقف واضح وأقر عقوبات قاسية على مرتكبين جرايم الابتزاز دي، وأكد إن الضحية هتفضل ضحية بغض النظر عن طبيعة الصور اللي بتتهدد بيها، وهل الصور حقيقية أو مفبركة، أو هل بعتتها الضحية برضاها ولا أتسرقت منها.

ركز المخرج المصري أنس عوض على القضية دي وقرر يعمل فيلم قصير يناقش الحالة الشعورية اللي بيمر بها ضحايا جرايم الابتزاز، ومن خلال التركيز على مشاعرهم قدر ينقل صورة واقعية مؤلمة عن التجربة القاسية اللي بيمروا بها في فيلم “أمر من السحر”.

من خلال سيناريو قصير مدته 7 دقايق قدر عوض يلخص القضية في مشاهد مليانة بمشاعر الخوف والندم والقلق والصدمة والشعور بالانكشاف التام.

بيقول عوض عن فيلمه إنه رسالة تحذيرية عن تأثير جرايم السوشيال ميديا الجنسية على الإنسان. وبيوضح إن هدف الفيلم هو علشان يكون كبسولة تقدر تنقل تجربة الضحية بشكل دقيق للمشاهد.

وعلشان المجرم مش بيفكر في شعور الضحية أو تأثير جريمته على الآخرين، فأهمية الفيلم تتركز في الطريقة اللي ناقش بها القضية؛ من خلال مجموعة من المشاهد التجريدية، واللي بتحوله لحالة شعورية داخلية مركزة في 7 دقايق.

تقدر من خلال “أمر من السحر” تعيش تجربة قاسية علشان تفهم الضحية بتحس بإيه، وهدف الفيلم من وجهة نظرنا هو عيش التجربة دي والوصول لحالة التعاطف مع الضحية، علشان نقدر نغير وجهة نظر الناس اللي بتهاجم الضحايا.

تجرأ عوض في فيلمه “أمر من السحر” على مناقشة واحد من أهم القضايا المسكوت عنها في مجتمها؛ من خلال الشخصية اللي مثلها “حاتم رضا” واللي بنشوف فيها راجل بيتعرض لابتزاز إلكتروني بصوره الخاصة، وهي قضية حساسة جدًا نظرًا لعدم قدرة مجتمعنا على تقبل فكرة إن يكون الرجل ضحية تعدي جنسي.

بيقول عوض إنه بغض النظر عن موقف المجتمع من ضحايا الاعتداءات الجنسية من الرجال، فالواقع بيقول إنه في منهم ضحايا وبأعداد مش قليلة؛ وبالتالي لازم نفتح النقاش ده النهارده، ولازم نتعلم كمجتمع ازاي ندعم الضحايا أيًا كانوا رجال أو ستات.

الفيلم من إخراج أنس عوض، وتمثيل شريف نور الدين وحاتم رضا وهدى الجبيلي، والموسيقى التصويرية للفيلم من إبداع حمزة شركس، وديكور عليا طارق وستايلست سلمى هشام، وميار الفولي special effects and makeup artist
و ياسر الشافعي منتج منفذ.

أخر كلمة: ماتفوتوش قراءة: اسمها كان على علب الدخان وخاف منها الإنجليز: حكايات من حياة منيرة المهدية