موسم الأفراح والخطوبات مابينتهيش، وأول حاجة بتفكر فيها البنت لما تتعزم على مناسبة من دول، وأول سؤال بييجي في بالها “ياترى هلبس إيه”، بغض النظر إنك لو دورت ورا السؤال هتلاقي 500 فستان في دولابها وتقولك في الأخر فين ده أنا ماعنديش لبس. واحنا قررنا إننا نساعدكم على قد ما نقدر ونجيب لكم أماكن ترزية حريمي تقدروا تفصلوا عندها الفستاين اللي نفسكم تحضروا بيها المناسبة، واتكلمنا معاهم وجبنالكم التفاصيل.
محمود الجوهري
بداية الأسعار عنده في السواريه 2200 جنيه، بس بعد كده السعر بيختلف على حسب الموديل، ومفيش سقف محدد وقال”خصوصًا لو في شغل يدوي وتطريز وأحجار وألوان، في أحجار دلوقتي سعرها بيوصل لـ100 جنيه للواحدة بس”. وبالنسبة للوقت، الزبونة هي اليي بتحدده وقال”لو جيتي لي وقولتي أنا عندي مناسبة كمان أسبوع، هنفذلك الفستان، بس كل ما في وقت بييقى أحسن، وفي أوقات من السنة بتبقى زحمة فمفيش مساحة، وفي أوقات ممكن نخلصه في يومين تلاتة”.
وبالنسبة للأماكن الخاصة بالقماش، ففي 3 أماكن؛ الوكالة والأزهر وشارع حسنين هيكل، وهو بيفضل فيهم شارع حسنين هيكل في مدينة نصر، والأزهر بيعتبره متاهة شوية.
وختم كلامه بنصيحة بيقولها للبنات “لازم تقعدي مع اللي هيعملك الفستان الأول قبل ما تجيبي القماش، وماتسمعيش كلام بتاع القماش، واللي يقولك عليه الترزي هاتيه”.
تقدر توصله علشان تحجز معاه من خلال رقمه 01120205074، وتقدر تشوف موديلات أكتر على صفحته من هنا. وعنوانه هو 33 شارع عماد الدين كامل، أول يمين من عباس العقاد، مدينة نصر.
أتيليه ريم
الأسعار بتبدأ عندها من 2700، وبعدين بيعلى حسب الموديل، وممكن التصميم يخلص في أسبوع لو مش في أوقات زنقة زيّ الأعياد. والمكان هو اللي بيجيب القماش، بس لو أنتي حابة إنك تجيبي بنفسك أتيليه ريم بينصح بمحل الأنصاري وأبو الغيط وميرا كلاس في حسنين هيكل. وسألناها لو في قماش معين بيبقى مناسب لفصل الخريف أو الصيف، قالت مش بيشترط بس في خامات معينة بتفضل الشغل بيها، زيّ الستانات والمشغول والشيفونات.
ونصيحة أتيليه ريم للناس اللي بتشتري القماش “أهم حاجة البنت تبقى فاهمة التصميم اللي عايزه تعمله إيه وعلى أساسه تجيب القماش، لكن ماينفعش تبقى عايزة تصميم معين وتجيب قماش مختلف لإنه عجبها وفي نفس الوقت تبقى عايزة الموديل يطلع زيّ اللي في الصورة بالظبط، لما يبقى نفس الخامة بتاعت التصميم الأصلي الحاجة بتطلع أحسن بكتير”.
للحجز وتفاصيل أكتر عن الأسعار، تقدر تبعت على الواتساب على الرقم ده 01002816234 وتاخد معاد بعدها بيوم أو اتنين، وعندهم صفحة على إنستجرام تقدروا تشوفوها منها صور أكتر من هنا. وعنوانهم 47 عباس العقاد مدينة نصر قدام شركة يونيون إير في الدور الـ15.
نبيل سمير – أزياء روما
اتكلمنا مع الترزي، نبيل سمير، وقال بالنسبة للأسعار “أنا مش بحط متوسط، في فستان سهل وفي فستان صعب، في فستان بياخد ساعة وساعتين وفيه يوم، فمش بحط رقم معين بس ممكن أبدأ بـ400 جنيه، ويوصل لألف وألفين. والفستان بيخلص حسب ما الزبون عايز، ممكن يوم أو أسبوع”. وبالنسبة للقماش فهو بيفضّل إن الزبون اللي يجيبه علشان ينقي براحته، وبالنسبة له فبيجيب من عند وجدي في التحرير، وممدوح في المطرية، والأنصاري في مدينة نصر، وشارع جمال عبد الناصر في جسر السويس فيهم كذا محل.
وقال عن الخامات اللي بيبقى الطلب عليها كتير في الصيف والخريف “ستان صالون بيتعمل منه فساتين سادة ونوعه حلو وخامته كويسة، والخامة التانية الكافيار في منها أشكال”. وكمل كلامه بإن “أهم حاجة يسألوا الترزي عن نوع القماش، لإن محلات القماش ساعات بتدي لك ستان ألترا موضة والفستان بيبقى عايز ستان صالون، وده بيأثر على الشكل الجمالي”.
مكان الأتيليه في عين شمس عند جامع القدس ومدرسة الأورمان في شارع الشيخ عبيد. بالنسبة للحجز، ممكن تروحوا المكان على طول، بس الأحد بيبقى إجازة وتقدروا توصلوا له من خلال رقم 01222285030.
آسمن
متوسط أسعار السواريه بيبدأ من ألف ونص حسب التصميم، وممكن يخلص خلال عشر أيام أو أسبوعين، وفي طلبات مستعجلة بيبقى سعرها أعلى شوية. وبالنسبة للقماش، بيجيبوه من شارع فرنسا في إسكندرية، وهما متاح عندهم قماش كل الأنواع في الأتيليه يقدر الزبون يختار منه.
موجودين في جليم في إسكندرية، وتقدر توصل لهم من هنا. والمواعيد من السبت للخميس من الساعة 12 للساعة 7، بس متاح عندهم يوصلوا كل المحافظات عن طريق إن البنت تبعت لهم التصميم اللي هي عايزاه والمقاسات عن طريق فيديو، وبيدفعوا مقدم، وبعد ما الشحن بيوصل بيدفعوا الباقي. ولتفاصيل أكتر، تقدر تكلمهم على الرقم ده 01228153874.
عم سيد
أسعار السواريه مالهاش متوسط ممكن 900 أو توصل لألفين. بالنسبة للوقت، فهو حسب الموديل، في فساتين بتاخد ساعتين وفي تلاتة وفي يوم كامل، ومهما كان صعوبته حد أقصى بيبقى يوم. والقماش لو هي البنت هي اللي بتجيبه، لازم ياخد المقاسات في الأول ويقول لها تجيب قد إيه ونوعية القماش، وبينصح بحسنين هيكل من عند الأنصاري، ومن الأزهر في محل اسمه محمد جابر ومحل اسمه الشيخ ابراهيم. وبالنسبة للقماش اللي مناسب للخريف، قال “في المشجر والكتان، وفي الملتون، وفي باسبالم وقماش اسمه سينيه، ودي كلها أنواع بتمشي في الخريف”. عنوان المكان 25 شارع محمود يوسف مدينة نصر، وممكن توصله عن طريق الرقم ده 01149539471.