بعد البيف بين أبيوسف ومروان موسى واللي دخل فيه كمان تقريبًا نص نجوم الراب سين في مصر، لقطة واحدة حصلت قلبت كل ده في كام ساعة، رجوع الرابر المعتزل مروان بابلو بأغنية “غابة”، تراك جديد وفيديو خد التريند، وكل الجمهور فرحان برجوعه وبالتراك، السوشيال ميديا كلها بقت بتتكلم عنه وعن التريند اللي كله بقى عليه، فتعالوا نشوف الناس بتقول إيه.
وفي ساعات قليلة جدًا، بقى تريند رقم 1 على يوتيوب، واحنا بنكتب المقال مش لاحقين نقولكم بالظبط رقم المشاهدات.
بعد ما بابلو اعتزل السنة اللي فاتت، طول السنة دي كل فانز الراب في مصر بيتكلموا عن رجوعه، حتى لما ماكنش فيه أي حاجة أو معلومة بتقول إنه ممكن يرجع، وفعلًا زيّ ما قال دلوقتي “حاضر مهما أغيب”، رجع وقلب كل حاجة موجودة، الناس كانت مستنية رجوعه لدرجة إننا شوفنا بيدج عملت الفيديو بتاعه 24 ساعة!
اقرا كمان: أول تريند في 2021: ويجز وروبي من ميمز لثبات انفعالي.
الناس مش بس اتكلمت عن إنهم فرحانين برجوعه أو عن التراك حلو ولا وحش، الفيديو نفسه الناس اتكلمت عليه وعجب معظم الفانز وشايفينه سينمائي، واتكلموا عن الكادرات والتصوير، واللوكيشن البسيط اللي كان في فيصل.
وطبعًا اللي مش من فانز الراب عمومًا، اتخضوا من السوشيال ميديا وإنها كلها مقلوبة على تراك جديد نزل ومش فاهمين حاجة.