على مدار السنين اللي فاتت، في مجموعة من الأفلام المهمة اللي اتعملت وكانت نقلة نوعية في السينما المصرية. وطلعت أجيال من النجوم الشباب بقوا نجوم كبار دلوقتي بنستنى شغلهم من السنة للسنة واحنا متحمسين. وبعد ما بنرجع بالزمن لورا بنسأل نفسنا.. ازاي عدت كل السنين بالسرعة دي! معقول الأفلام دي عدى عليها كل السنين دي! ولإنها كونت جزء من ذكرياتنا. جمعنالكم أفلام عدى عليها أكتر من 20 سنة وبنحس إن لسه شايفينها امبارح!
أصحاب ولا بيزنس
الفيلم كان بيتكلم عن شلة صحاب بيجمعهم مجال عمل واحد، والمصالح والطموح بتقف عائق قدام الصداقات دي. بس الصداقة في الأخر هي اللي انتصرت! أغاني الفيلم من الحاجات المميزة اللي فيه وكان عامل أساسي من عوامل نجاحه هو إنه اتطرق للقضية الفلسطينية.
صعيدي في الجامعة الأمريكية
من أهم البطولات الجماعية السينمائية اللي اتعملت. وهو اللي خلى فكرة البطولة الجماعية تنجح. وكل واحد من النجوم اللي شاركوا فيه بقوا دلوقتي أبطال وكل فنان فيهم قادر إنه يشيل بطولة فيلم لوحده. اتعمل سنة 1998 وبعد مرور أكتر من 23 سنة لسه الناس بتتكلم وبتحكي عن الفيلم!
ليه خلتني أحبك
فيلم عدى عليه أكتر من 22 سنة بس لسه أغانيه معلقة مع الناس لإن كلامها كان صادق وحقيقي. كان بطولة منى زكي وكريم عبد العزيز وأحمد حلمي وكانوا لسه كلهم في البدايات الفنية بس كانوا مميزين.
شورت وفانلة وكاب
من الأفلام الرومانسية الخفيفة اللي اتعملت واللي برضه كانت أغانيه من العلامات المميزة فيه بصوت مدحت صالح. وكانت أول بطولة لنور في مصر. الفيلم فاز بخمس جوائز من ضمنهم جائزة أحسن مخرج وأحسن ممثل.
أفريكانو
اتعمل سنة 2021 والثنائي منى زكي وأحمد السقا كان في بينهم كميا عالية. شجعتهم إنهم يعملوا أكتر من عمل فني ناجح مع بعض بعد الفيلم ده.
الناظر
من أهم الأفلام الكوميدية اللي اتعملت وقتها. أحمد حلمي وعلاء ولي الدين ومحمد سعد عملوا ميكس عظيم في الحوار والسيناريو، والإيفيهات بتاعتهم لسه الجمهور بيستخدمها لحد دلوقتي.
اللمبي
من الشخصيات المهمة اللي خلقت نجاح لمحمد سعد وعملت له نجوميته وصنعت شعبيته خصوصًا بعد فيلم الناظر.