المصريين عمرهم ما كانوا بيقولوا “كفاية كده” لما بيحبوا أكلة معينة، وده اللي حصل مع الرنجة! من زمان وإحنا بناكلها بالطريقة التقليدية مع البصل والليمون، لكن كل سنة لازم حد يخترع لنا حاجة جديدة تكسر القواعد.
السنة دي افتكاسات الرنجة خرجت عن المألوف تمامًا، بقت في الكريب، وفي الجلاش، وحتى مع السمنة البلدي! مش عارفين نقول ده إبداع ولا تهور، لكن اللي متأكدين منه إن تجربة الأكلات دي مش هتعدي من غير جدل!
تعالوا نشوف أغرب وأجدع افتكاسات الرنجة في عيد الفطر 2025.. يا ترى هتجرب ولا هتقول “خليني في الكلاسيك أحسن”؟
لا تفوّت قراءة: حضّر سحورك في 10 دقائق.. 7 أفكار سهلة ومغذية تمنحك طاقة طوال اليوم
الرنجة بالعسل والمستردة – لما الحلو يقابل الحادق!
تخيل بقى.. الرنجة بالعسل! غريبة؟ آه، بس لما تختار رنجة دلعة مع عسل خفيف، الطعم يبقى حاجة تانية.
ولأن الطعم الحلو لوحده مش كفاية، رشة مستردة تخلي المزيج متوازن ومثير للتجربة.
لو بتحب الحلو مع الحادق، يبقى ده خيارك الجريء السنة دي! تقدر تلاقي الاختراع ده عند “سلاحف الرنجة“.
كرات الرنجة المقلية.. قرمش القرمشة!
تخيل الرنجة بشكل جديد تمامًا! بدل ما تاكلها بالطريقة التقليدية، جربها مقلية على شكل كرات أو صوابع مقرمشة.
بتتغلف بالبقسماط وتتحمر لحد ما تاخد لون دهبي يفتح النفس، وتتقدم مع صوص طحينة أو مايونيز.
لكل عشاق الفرايد والمقرمشات.. دي تجربة لازم تجربها!
والله وبقت الـ”رنجة بالساور كريم”!
رنجة مع ساور كريم؟ التجربة دي أكيد مش لأي حد! لو الساور كريم مش متوفر، ممكن تستبدله باللبنة أو الزبادي.
الغريب هنا إنك تجمع منتج ناعم ورقيق مع حاجة حدقة وقوية زي الرنجة، بس أدينا هنجرب ونشوف!
اعملها زي أي سلطة رنجة عادية، بس زود شرايح بصل ولمسة مفاجئة بمكعبات تفاح صغيرة.. يمكن يبقى الاكتشاف الجديد!
لا تفوّت قراءة: طبق الكشري: سر مشترك بين محمد صلاح وعمر مرموش في رحلتهما الاحترافية في أوروبا
مكرونة بشاميل بالرنجة.. مغامرة ولا تهور؟
مكرونة مع سلطة رنجة؟ ممكن تعدي زي التونة. لكن مكرونة بشاميل بالرنجة؟ هنا لازم نقف لحظة!
تخيل الرنجة بدل اللحمة أو الفراخ، وبيقولوا الطعم وهمي، خاصة لو زودت جبنة شيدر علشان توازن الملوحة.
لو نفسك تجرب، هتلاقي الاختراع ده في “فسيخ ورنجة” أو عند “ملك الرنجة”!
برجر الرنجة.. الغالي في ثوبه الجديد!
أحدث افتكاسة في عالم الرنجة، وناس كتير جربوه وقالوا يستاهل المغامرة!
الفكرة إن شرائح الرنجة المدخنة بتتحول لبرجر مقرمش ولذيذ، جوه عيش طري، ومع إضافات توازن الملوحة.
لو حابب تجرب، هتلاقيه في “فسيخ ورنجة“!
سوشي الرنجة.. لما المصري يقابل الياباني!
أغرب افتكاسة جديدة: سوشي بالرنجة بدل السالمون!
الرنجة المدخنة بتتلف مع الأرز الياباني، الأفوكادو، الخيار، ومايونيز سبايسي، وكل ده جوه ورقة نوري، ويتقطع رول سوشي عادي.
حاجة مش متوقعة.. بس ممكن تستاهل التجربة!
لا تفوّت قراءة: الخلصانة بالفراولة ولا الألماظية؟.. افتكاسات حلويات رمضان كل سنة أغرب!
كرواسون الرنجة – كفاية كده بقى!
زي ما سمعت.. كرواسون محشي رنجة!
بعض المحلات بدأت تقدمه مع جبنة كريمي أو زبدة وشبت، وبيقولوا إن الطعم مش بطال لو بتحب الرنجة مع حاجة طرية.
بس بجد ليه بيخلطوا الحضارات كده؟ بعد السوشي الياباني بالمصري، دلوقتي الفرنسي مع المصري! لو عايز تجرب، مطعم “فساخنيستا” بيقدمه.