على مدار سنين كتير، الأغاني والموسيقى عدوا معانا بمراحل كتير، وكان في تغيير في المشهد الموسيقي في مصر والعالم العربي بل مستمر، وكل فترة لها طبع خاص في مزيكتها وأغانيها، لكن دلوقتي ساعات لما نرجع نبص كده على أغاني قديمة شوية بنلاقي حاجات غريبة مش عارفين عدت علينا ازاي ومرت مرور الكرام، والحقيقة لما ركزنا اكتشفنا إن ده مش في الأغاني القديمة بس.. تعالوا نشوف.
في إيه بينك وبينها
بغض النظر عن إنك قريت الجملة بصوت حسن شاكوش أو صوت آمال ماهر نفسها، الفنانة لما عملت الأغنية كانت مشكلتها “خونني مع واحدة غيرها مش أقرب واحدة ليا” يعني بص عيش حياتك عادي بس ليه تصاحب صاحبتي؟ يعني تتخانقي مع بنات جنسك لكن تسيبيه هو داير كده عادي مافيش مشكلة؟
في الأول الفنانة قعدت -زي أي واحدة مننا- تجمع الخيوط ببعض وحست إن في حاجة بين خطيبها وبين صاحبتها المقربة، ونظرة عينك وعينها صدقني مش بريئة.
“عاوز تبعد ما تبعد واجرح قلبي وعينيا، خونني مع واحدة غيرها مش أقرب واحدة ليا” يعني ماتخلّيش الجرح جرحين.
يحكيلي عنها
من أكبر كرينجات الأغاني اللي لحد دلوقتي مافيش عندنا أي تفسير لها أو حتى ازاي عدت على الناس عادي كده، الموضوع كله على بعضه مريب من أول الأغنية، لا والأجمد بقى إن كمان لها فيديو كليب يعني مش سايبينك لخيالك.
الفنان بيحكي لصاحبه على حبيبته، وصاحبه ده حبها من كتر كلام حبيبها الكويس عنها! طب بالنسبة لقوانين الطبيعة والبشر وحتى قوانين حكم التكاتك اللي بتقول اللي يخصك يحرم عليا؟
“عمال يحكيلي عنها عمال يوصفلي فيها وكلامه هز قلبي خلّاني حلمت بيها” ده أول كوبليه في الأغنية، هنسيبك بقى مع الباقي تسمعه بصوت الفنان هشام عباس بنفسه.
بتحبها ولا
هنا بقى الفنانة أنغام عملت مثال جديد من نوعه، حبيبها بيحب واحدة تانية علشان بس هي شبهها، طب والأصل طيب؟ ما أنت مصاحب الأصل نفسه، رايح تحب واحدة تانية علشان شبه حبيبتك؟ يعني تتحسب عليك خيانة على الفاضي كمان.
الناس كلها أجمعت على إن البنت شبهها لدرجة إنهم شكوا إنهم توأم “كل اللي شافها قال توأم شبهنا خيال، صورة وصوت ليا” طب رايح تحب واحدة تانية علشان تفكرك بيها؟
الجميل في الموضوع إن أنغام بتطرح التساؤل بمنتهى الأريحية والتصالح مع النفس، بص حتى ضحكتها في الفيديو كليب عاملة ازاي.
يا أنا يا أنت
الفنان محمد حماقي في بداياته إدالنا برضه حتة رمي جتت كده، من نوعية إن هتروح مني فين أنا بحبك وهنرتبط يعني هنرتبط، ولا يكترث بقى بحبيبته تيجي ماتجيش هو كده كده راضي يعني.
بس برضه علشان نشد ونرخي مايبقاش كله ضرب ضرب، بيعرض عليها عرض مايتفوّتش، “هتيجي هتيجي، مين يسيب حد كل ده بيهواه؟” وبيفكر يندّمها كمان “يا أنا يا أنت وبكره أورّيك، بُعدك غلطة هتشوفها بعينيك، كل ده يا حبيبي وقت على الفاضي احنا ضيعناه” يعني من الآخر انجزي مالناش غير بعض في الآخر وبطلي تُقل.
وهنا حابين نوضح حاجة مهمة جدًا، حماقي بيفرض نفسه على حبيبته اللي بتبادله نفس الشعور لكن بتتقل عليه شوية، مش بيرمي جتت على الناس ويفرض نفسه على حد مش حابه وبيقرفه في عيشته ويطارده، مابنعملش كده لأ.
قلب فاضي
احنا عارفين إننا كده بنلعب في الثوابت وممكن الناس تهاجمنا، ماحدش يقدر يقرب من الكينج محمد منير وأغانيه. بس بصراحة ماقدرناش نمسك نفسنا ومانعلقش على أغنية كنا بنسمعها عادي جدًا طول السنين اللي فاتت، بس دلوقتي شوفناها بنظرة مختلفة.
الكينج بيعرض قلبه للبيع، وبيقول مميزات تجذب المشتري كمان: “قلب فاضي قلب طيب قلب هادي، قلب كله حنا وعطف يخطفك من الحزن خطف” لا وكمان إيه مش كده وبس، لأ الكينج بيضحّي النهارده: “مستعد يحب حتى قلب عايز ينسى ماضي” يعني خلاص الحالة بقت صعبة لدرجة إنه عايز أي حد يشيل البيعة ويمشي، ولا أجدع بياع في سوق العبور الساعة 5 المغرب.