“أقوى رجل في العالم” اللقب الأشهر للمصارع أشرف كابونجا، نجح في سحب مترو الأنفاق بذراعيه، بحمولة حوالي 300 طن، كابونجا مش أول مرة يحطم أرقام قياسية ويدخل موسوعة جينيس، لكن سحب المترو دي أحدثهم ونجح في المحاولة دي امبارح، تعالوا نشوف كام مرة حطم فيها كابونجا أرقام قياسية، وإزاي ابتدى مشواره.
اكتشف موهبته في سن صغير، ووقتها صمم إنه يتعلم رياضة الكونغ فو، وقام بدفع عربة يد بتحمل 250 قالب طوب، وبعدها دفع لودر كبير، وماتعبش، وقتها عرف إن عنده قوة حقيقية لكنه ماكانش عارف يوظفها، وده لما كان عنده 16 سنة، ولما وصل لسن 24 أصبح مدرب للكونغ فو. وبالنسبة لمحافظته على لياقته البدنية، كابونجا صرح إنه بيحافظ على التدريب يوميًا وتناول الأكل الصحي.
أشرف محروس ابن محافظة الإسماعيلية، كسر الرقم القياسي الهندي لسحب الشاحنات العملاقة، بعد ما سحب شاحنة وزنها 15 بأسنانه! وده أكبر من الرقم القياسي اللي حققه شخص من الهند، بسحبه شاحنة وزنها 13 طن. وكان عنده حلم في كسر الرقم القياسي الماليزي واللى سجل بقيام أحد الأشخاص بسحب 260 طن بأسنانه في 2003، وكمان كسر الرقم القياسي الأسترالي واللى سجل بـ204 أطنان سنة 2021.
في وقت سابق، تقدم كابونجا للفريق أسامة ربيع، رئيس هيئة قناة السويس، بطلب علشان يتيح له فرصة لشد الكرارة، في البداية حاول عدة مرات إنه يشدها ولكنه ماقدرش، حتى إنه بكى من التأثر ولكنه قرر إنه يسحبها وبالفعل نهض وسحبها مرتين لحد ماتحركت في المياه 30 متر، بعدها سحب مركب بأسنانه، وصرح إنه بيستعد لسحب 16 ألف طن خلال الفترة المقبلة. وأضاف كمان إنه سحب سيارة تريلا عليها ألف و150 أنبوبة بوتاجاز، وبيستعد لسحب طائرة!