طبقت مصر إمبارح الثلاثاء قرار حظر دخول القادمين من الخارج من كل الجنسيات بدون وجود شهادة تحليل الPCR الخاص بفيروس الكورونا، بنتيجة سلبية قبل الرحلة ب 72 ساعة كحد أقصى، والقرار بيشمل المصريين والأجانب اللي جايين من كل مكان في العالم.
وتم استتثناء المطارات الساحلية من القرار ده في حالة عدم وجود شهادة تحليل الPCR مع المسافر بشرط إجراء التحليل في المطارات الساحلية المصرية الأربعة، وهما: الغردقة، وشرم الشيخ، وطابا، ومرسي علم.
التحليل بيكون بمقابل 30 دولار، وبيحظر انتقال المسافر لأي مكان داخل البلد إلا بعد اجراء التحليل وظهور نتيجة سلبية. كمان بيستثنى من القرار ده الأطفال اللي سنهم أقل من 6 سنين من جميع الجنسيات، وده بعد ما صرحت سلطة الطيران المصرية بشكل رسمي إنهم معفيين من تقديم شهادة التحليل عند وصولهم المطارات المصرية.
القرار ده ضمن عدة قرارات لضمان اتباع الإجراءات الاحترازية في المطارات المصرية، وفقًا لمنظمة الصحة العالمية ووزارة الصحة المصرية، للحفاظ على سلامة المسافرين، والوافدين، والمواطنين في مواجهة انتشار فيروس الكورونا المستجد بعد تنبؤات بموجة تانية للفيروس.
والإجراءات دي من ضمنها بردو تخفيف التكدس، خصوصًا في أماكن التفتيش، والجوازات، والكاونترات، والمصاعد الكهربائية.
