أخ تجردت منه كل مشاعر الأخوة: خطف أخته علشان يصورها في وضع مخل ويبتزها علشان تتنازل عن ميراثها!

في حادثة بشعة بكل المقاييس ومجردة من كل مشاعر الإنسانية والأخوة، وفي وسط ما احنا بنحاول ننشر ثقافة الدعم النفسي والمعنوي للناس القريبين مننا، لقينا ناس لسه بتهدم كل ما هو جميل وحقيقي ممكن يكون بين الأخوات، الأخ اللي المفروض يبقى ظهر وسند لأخته، خطفها وأهانها وضربها وهددها علشان الميراث، وبدل ما هو يحميها ويبقى مصدر أمانها، ناس تانية اللي قاموا بحمايتها منه!

في حوار صحفي طلعت فيه الضحية وهي بتتكلم إنها كانت بتعامله زيّ ابنها بعد وفاة الأب والأم واهتمت بيه وكانت بتصرف عليه طول الوقت، بس هو ماقدرش كل ده وماكتفاش إنه بس يهددها بالكلام علشان تتنازل عن ميراثها، لأ، فوق كل ده كانت الطريقة اللي لجأ لها أبشع من أي تهديد أو ابتزاز، ده اتفنن زيّ أي شيطان في الطريقة اللي تجبرها إنها تتنازل عن ميراثها اللي هو حقها!

عمل خطة كاملة علشان يستدرجها وكل ده بمساعدة صاحبه! وفي حوارها الصحفي حكت إيه اللي حصل لها بظبط من أول لما خطفها، لحد ما الناس أنقذوها بعد ما سمعوا صريخها! قالت إنه أقنعها إنهم رايحين مشوار وقفل عليها باب العربية لحد ما أخدها هو وصاحبه لمنطقة زراعية وربط إيديها وبدأ في محاولة الاعتداء عليها علشان يصورها في الوضع ده، ويفضحها وسط طلابها في الجامعة لو رفضت توقع على ورقة التنازل، بس الناس قدرت تنقذها لما سمعت صوت استغاثتها وبلغوا عنه الشرطة.

الأخ اللي المفروض يستر عرضها كان عايز هو ينهش فيه! المجرم ده بعد القبض عليه وتقديمه للعدالة، نتمنى إنه ياخد الجزاء اللي يستحق الجريمة اللي اتعملت، واللي هدمت أي شيء إنساني ممكن يبقى بين الأخ وأخته.

أخر كلمة: ماتفوتوش قراءة: من تحرش في الشارع للشتيمة والضرب على الملأ: إيه اللي حصل مع ليللي كربا