أحسن أفلام رومانسية تقدر تتفرج عليها في العيد ده

العيد داخل علينا خلاص، وتقدر تقضي وقتك وتسلي نفسك بفيلم رومانسي. وطبعًا بما إن السينما المصرية مليانة أفلام رومانسية كتيرة على مر السنين المختلفة، كان صعب نختار أحسن أفلام، لإن ببساطة معظم الأفلام دي حلوة، بس إحنا قررنا نختارلكم أحسن مجموعة من فترة الألفينات.

وأكيد هيكون أحسن لو بتتفرج على الأفلام دي مع شريك حياتك، وبالرغم من إن مشاهد كتير ممكن تبان ساذجة أو مبالغ فيها، إلا إن النوستالجيا والمشاعر الصادقة اللي في الأفلام دي هتنسيك كل حاجة تانية، وهتساعدك إنت والشخص ده تعبروا عن مشاعركم بشكل أحسن لبعض.

متنسوش تعملوا فشار، وتختاروا كنبة مريحة، وتقضوا وقت لطيف وإنتوا بتتفرجوا على الأفلام دي.

السلم والتعبان

السلم والتعبان بيحكي حكاية بنت قلبها مكسور وشاب طائش وكل الدراما اللي بتحصل ما بينهم، وطبعًا هو واحد من أهم أفلام الحقبة دي إن مكانش أهمهم. حازم، اللي بيلعب دوره الفنان هاني سلامة، بيعجب ببنت إسمها ياسمين، اللي بيقوم بدورها الفنانة حلا شيحة، وببطئ الإعجاب ده بيتحول لحاجة أكبر منهم هما الإتنين، بس لما حازم بيرجع لعاداته القديمة، الحب اللي بينهم بيكون ضحية، وعشان تعرف اللي حصل لازم تكمل باقي الفيلم بنفسك.

في فترة اللي فاتت كان فيه إشاعات عن إصدار جزء تاني من فيلم السلم والتعبان، بس لحد دلوقتي لسه مفيش حاجة أكيدة.

أهواك

تامر حسني في أهواك بيلعب دور شريف، جراح تجميل شاطر، اللي بيعجب ببنت جميلة إسمها بسنت، ومع الوقت بيتعرف على والدتها رنا، وبيدرك في ساعتها إنه حب الأم رنا من أول نظرة. طول الفيلم شريف بيحاول يوصل لرنا عن طريق بنتها بسنت بشكل هيموتك على نفسك من الضحك.

رسائل البحر

يحيى، طالب في كلية طب، عنده مشكلة في الكلام بيهرب من العاصمة للساحل الشمالي بعد سنين من تحمل تنمر صعب، وبيقرر إنه يشتغل صياد. وهناك بيقابل نورا اللي بتشتغل في الدعارة، وبيقع في حبها.

آسر ياسين وبسمة قدموا أداء تاريخي في الفيلم ده، وقدموا الثنائي ده بشكل مبهر على الشاشة.

سحر العيون

بنتين بيلعب دورهم الفنانة نيللي كريم والفنانة هلا شيحة بيقعوا في حب شابين بيقدمهم كل من الفنان عامر منيب والفنان محمد لطفي. وفي الأول الولدين مش بيبادلوهم الشعور، وده بيخلي البنات يلجأوا لحل غير تقليدي وهما إنهم يروحوا لمشعوذ يخلي الولدين يقعوا في حبهم، بس بدل ما الساحر ده يخلي عامر منيب يحب حلا شيحة ومحمد لطفي يحب نيللي كريم، بيلخبط الدنيا وبيعكس الأدوار، والقصة بتحلو من هنا.

ليه خلتني أحبك

يمكن من أحلى الأفلام الرومانسية الكوميدية في فترة الألفينات، ليه خلتني أحبك بيحكي قصة داليا، اللي بتقوم بدورها الفنانة منى ذكي، اللي بتندم بعد ما سابت حبيبها هشام، اللي بيلعب دوره الفنان كريم عبد العزيز، وبتبدأ تخطط إنها تبوظ خطوبته لحبيبته الجديدة الفنانة حلا شيحة. الفيلم ده من الأفلام اللي هتخليك تضحك وتعيط في نفس الوقت.

بحبك وأنا كمان

في بحبك وأنا كمان، مصطفى قمر بيلعب دور نور المغني الموهوب اللي بتجيله فرصة يلعب دور البطولة في فيلم مع النجمة المشهورة فريدة فتحي اللي بيقوم بدورها الفنانة سمية الخشاب، وبالرغم من اللغبطة اللي في أول علاقتهم اللي كانت ناقر ونقير، إلا إن الإتنين بيبدأوا يكونوا مشاعر لبعض.

إذاعة حب

فيلم إذاعة حب فريد من نوعه لإنه بيناقش مبدأ الثقة بين شخصين، الحكاية بتبدأ لما حسن وليلى -اللي بيقوم بأدوارهم شريف سلامة ومنة شلبي- بيتعرفوا على بعض وبيبدأوا يقعوا في الحب، بس للأسف الإتنين عشان ينالوا إعجاب بعض كذبوا وزيفوا حقائق واخترعوا شخصيات غيرهم، بس لما بيكتشفوا إنه بيشتغلوا في نفس إذاعة الراديو، وبيواجهوا بعض بالحقيقة، كل حاجة بتتغير.

أحلام عمرنا

أحلام عمرنا بيتكلم عن الحب ودوره في إنه يساعدنا نحقق أحلامنا، الفيلم بيحكي قصة خالد -مصطفى شعبان- اللي بيحاول يطلع برا البلد عشان يلاقي فرص شغل أحسن بس خططه كلها بتتغير لما بيقع في حب صديقته المقربة ندى -منى ذكي-، وبيقرروا يسافروا مرسى علم ويبدأوا حياة جديدة هناك.

في وسط الأحداث بيتعرفوا على ست ورثت أرض من أهلها وعمها اللي بيحاول يجبرها تبيعها، والثنائي بيقرر يساعدها عشان هي كانت حابة تفتح كافيه هناك، وعشان تعرف اللي حصل لازم تشوف الفيلم بنفسك.

العيد هتلاقي فيه أوقات فراغ كتير، ومع الفراغ، مافيش مانع تاخد جرعة رومانسية تسلي الأجازة وتفكرك بالذي مضى.

آخر كلمة: ماتنساش تتابع: عايز تأنتخ؟ جبنالك كتالوج لتقضية العيد في البيت