خبيرة التجميل المصرية آية عبد الحميد حصلت على لقب أفضل خبيرة تجميل في الشرق الأوسط من علامة شارلوت تلبوري العالمية لمستحضرات التجميل لسنة 2023، وده بعد إطلاق الشركة لمسابقة في شهر مارس اللي فات، لاختيار أفضل خبيرة تجميل في الشرق الأوسط. والمسابقة كانت عبارة عن 3 أجزاء ابتكرت فيهم المتسابقات إطلالة جديدة كل أسبوع لضيفة مختلفة من المشاهير.
آية عبدالحميد قالت: “مبسوطة طبعًا باختياري كأفضل خبيرة تجميل في الوطن العربي من علامة تجارية عالمية زي شارلوت تلبوري، وده خلّاني أحس بفخر خصوصًا إني بحب المهنة دي من وأنا صغيرة. وده شجعني كمان إني أسافر برا مصر واتعلم أكتر عن كل جديد في المهنة وأدرسها”.
وبما إنها اتربت على إيد واحد من أهم اللي اشتغلوا في السينما في مصر، وهو والدها الماكيير محمد عبدالحميد، آية دخلت عالم التجميل وقدرت تثبت نفسها واشتغلت في أفلام مهمة زي الفيل الازرق 2، كيرة و الجن، الكاهن، ومسلسلات زي حلاوة الدنيا، مجنونة بيك، الصندوق. واشتغلت مع عدد من نجوم الوطن العربي زي هند صبري، منى زكي، أمينة خليل ، شيرين رضا، ياسمين صبري ، كارن وازن.
آخر كلمة: ماتفوتوش قراءة: لو بتدوري على حيل بسيطة لمكياج أحلى.. فيديوهات آية عبد الحميد هتساعدك