ورمضان ماشي خلاص، خلينا نشوف مين الممثلين اللي أبهرونا بأدائهم السنة دي!

موسم مسلسلات رمضان 2020 كان غير أي حاجة شوفناها قبل كدا؛ السنة دي كان فيها أكتر من عمل فني مبهر قدم حاجة جديدة للشاشة المصرية مكانتش موجودة قبل كدا. يمكن من أحسن المواسم اللي مرت علينا في الكامة سنة اللي فاتت دول، ومن وسط مسلسلات كتير جميلة، فنانين عارفينهم وبنحبهم رجعوا تاني للتلفزيون عشان يفاجئونا بأداء أكتر من رائع أسرنا كلنا في الـ 30 يوم.

من الدراما الوطنية اللي في مسلسل الإختيار، للخيال العلمي في النهاية والدراما الأسرية في لعبة النسيان، دي الأعمال الفنية والممثلين اللي تفوقوا على نفسهم في رمضان ده.

أمير كرارة – الاختيار

مسلسل “الاختيار” بيحكي اللحظات الأخيرة من حياة الشهيد البطل المصري أحمد المنسي قبل استشهاده في شمال سيناء. كل اللي شافوا المسلسل لحد دلوقتي بيشيدوا بقوة القصة وتمكن الممثلين من أدوارهم بالذات الفنان أمير كرارة اللي كان حريص على تجسيد دور الشهيد أحمد المنسي بشكل مُشَرِف يخلي العالم كله يعرف من هو البطل ده.

يوسف الشريف – النهاية

“النهاية” هو حاجة مختلفة تمامًا عن اي حاجة شوفناها على التلفزيون المصريّ، مش بس كفكرة أو حبكة، بس كمان كتكنولوجيا وكجرافيكس، لإن المسلسل مليان سفن فضائية بتطير والـ virtual touch pads إن المسلسل مبنيّ بشكل كبير على الـ CGI.

القصة بتحكي عن مهندس بيحاول يلاقي بديل طاقة يكون مُتجَدِد ومُتاح للكل بسعر رخيص بعد أزمة الطاقة اللي عانى منها العالم بسبب سوء استهلاك الموارد. المسلسل مليان مؤامرات وشخصيات شريرة بتحاول تنتقم من البشرية كلها، ويمكن عشان الحبكة متقدمة بشكل مختلف دا بيخلي النهاية من أحسن المسلسلات اللي شوفناها في رمضان ده.

محمد رمضان – البرنس

بعد غياب طويل لمحمد رمضان عن دراما رمضان، يرجع السنادي بعمل قوي خلاه يتصدر التريند وينافس بيه على لفة أقوى مسلسل في رمضان 2020. مسلسل البرنس بيحكي عن قصة رضوان البرنس والأحداث اللي بتدور بينه وبين أفراد أسرته والشدائد اللي بيتعرض ليها.

دينا الشربيني – لعبة النسيان

السنة اللي فاتت دينا الشربيني كسرت الدنيا بمسلسلها زي الشمس اللي قدرت بيه تثبت إنها واحدة من أفضل المواهب الصاعدة في مصر والوطن العربي، والسنة دي دينا الشربيني رجعت تاني عشان تبهر الجمهور بدور رقية في لعبة النسيان.

مسلسل لعبة النسيان هو دراما أسرية اجتماعية بيحكي قصة رقية اللي عملت حادثة وصحيت بعد كذا سنة عندها فقدان جزئي للذاكرة، ومع كل حلقة الجمهور بيعيش التشويق والخوف اللي رقية بتحس بيه وهي بتكتشف حياتها القديمة وبتحاول توازن بينها وبين حياتها الجديدة.

يسرا – خيانة عهد

مسلسل خيانة عهد من بطولة الفنانة يسرا هو واحد من أقوى الأعمال الدرامية اللي موجودة على شاشة رمضان 2020؛ المسلسل من نوع الدراما الاجتماعية وبتقوم فيه يسرا بدور عهد الأم اللي بتدخل في صراع مع أختها فرح -اللي بتقوم بدورها الفنانة هلا شيحة-.

مشهد جنازة هشام إبن عهد يمكن يكون واحد من أقوى مشاهد رمضان 2020، واللي فيه اثبتت يسرا إن نجمها مختفش، بالعكس هي بتتألق كل سنة عن اللي قبلها.

أسر ياسين – بـ 100 وش

مين فينا مبيستناش يشوف بـ 100 وش كل يوم عشان نشوف عصابتنا الجميلة وصلت لفين. يمكن المسلسل ده هو الوحيد من النوع الكوميدي اللي كمل في المنافسة في رمضان ده وتحول لتريند، وده طبعًا يرجع للشخصيات اللطيفة الكتير اللي فيه وأحداثه المؤثرة وإفيهاته اللي هتفضل معانا سنين قدام، بس يمكن واحد من أهم أسباب نجاح المسلسل هو عمر اللي قام بدوره الفنان آسر ياسين وهو شاب نصاب بيتعرف على سكر -نيللي كريم- بعد ما كان بيحاول يخدعها، وبيقعوا في حب بعض.

نيللي كريم – بـ 100 وش

بـ 100 وش مش بس شفنا فيه أداء رائع من آسر ياسين، بس نيللي كريم كمان اثبتت إنها تقدر تتألق في الأعمال الكوميدية زيها زي أعمال الدراما. نيللي كريم السنة دي قامت بدور سكر، البنت “اللبط” اللي دمها خفيف اللي بتحاول تخلق حياة أحسن لنفسها وللعيلة بتاعتها عن طريق عمليات السرقى اللي بتخطط ليها مع عصابتها.

أخر كلمة: في رآيك مين أكتر ممثل اثبت نفسه رمضان ده؟ عرفنا في الكومنتس!

تعليقات
Loading...
Tweet
Share
Share
Pin