المصري معروف بجبروته، وبحبه للأكل البيتي، عشان كده فكرنا في المغتربين، لو انت مقيم في الإمارات وبتشتغل أو بتدرس، عملنالك قايمة بـ 10 مطاعم مصرية في دبي، عشان كل ما تحس إنك وحيد، تطلب طبق ملوخية يونسك.
أكل بيتي مصري:
حدوتة مصرية
مطعم حدوتة مصرية موجود على طريق الشيخ زايد، وفي مول ابن بطوطة، من أجمل المطاعم المصرية في دبي، ومعروف بجودة أكلاته وأجواءه المثالية، ومن أشهر المأكولات هناك الملوخية، والطعمية، وشوربة العدس، ولسان العصفور، والبصارة، والكبدة والسجق الأسكندراني، والجبنة بالطماطم، والمسقعة، والرز المعمر.. وتقدروا تلاقوه من هنا.
اقرأ كمان: الإرشادات والتعليمات اللي هيتم اتباعها في المطاعم والمقاهي عشان الكوفيد.
كايرو جورميه:
موجود على طريق الشيخ زايد، في 260 مبنى الديار، معروف بأسعاره المعقولة وخدماته الممتازة، وأكله الشهي، ومن ضمن أكلاته الفول، والطعمية، والمسقعة، والكشك، والكباب، والكفتة، والفتات زيّ فتة الموزة والكوارع، والرز بلبن، وأم علي. وتقدروا تلاقوا وجهته من هنا.
مطاعم مشويات:
صبحي كابر
معظمنا عارف المطعم الشعبي صبحي كابر اللي موجود في شبرا بمصر، وموجود في دبي على طريق الجميرا في أم سقيم، ومعروف بجودة أكله الممتازة، وكمياته المهولة، وخدماته اللي بجودة عالية.. ومن أكتر أكلات اللي بتتطلب هناك شوربة الكوارع، والكبدة، والكباب والكفتة، والممبار، والملوخية، والطواجن زيّ الفريك والتورلي. ونقدر تلاقيه من هنا.
شوف كمان: فكهاني مصري بيغير العالم من دبي
أكلات شعبية اقتصادية:
كشري أبو طارق
من أشهر وأجمل الأماكن اللي تأكل فيها كشري في مصر، وكمان في دبي، موجود في البرشاء 1، ومتوفر عنده أطباق الكشري بكل الأحجام ولكل الأفراد، وللأطفال كمان، وموجود كمان للتحلية رز بلبن، ومهلبية، وقرع العسل، وعصير السوبيا. وموجود هنا.
الأمور اكسبريس:
موجود في البرشاء في مبنى الزرعوني قدام مول الإمارات، ومعروف بأسعاره المعقولة، وأكله اللذيذ، وخدمته الممتازة والسريعة، ومن أشهر أكلاته الشوربة، والمكرونة بشاميل، والمسقعة، وطواجن اللحمة والعكاوي، وفتات الموزة ولحمة الرأس. وتقدروا تشوفوا الوجهة من هنا.
مسمط بحه:
واحد من أشهر مطاعم مصر المشهورة بأكلها الشعبي، وموجود في دبي بمبنى الممزر في أبو الهيل بالديرة، ومشهور بالشوربة، وطاجن البامية، والملوخية بالبط، وأطباق السمين، والمخ، والكباب، والكفتة. وتقدروا تزوروه من هنا.
مطبخ أكل الهوانم:
موجود في شارع أم سقيم بمنطقة القوز الصناعية، ومن أكلاته المشهورة الشكشوكة، والفول الأسكندراني، والطعمية، والعكاوي، وفتة الضاني، والكشك، وكفتة داوود باشا، والرز المعمر، والمسقعة باللحمة المفرومة. وموجود هنا.
لازم تقرأ: لو بتحب السفر لوحدك يبقى المعلومات دي عشانك
أرابيسك:
موجود في نخلة الجميرا، أرابيسك معروف بأكلاته العربية والمصرية، وبخدمته الممتازة، وطاقم العمل الرائع. من أشهر أطباقه الملوخية، وورق العنب، وفتة اللحمة، والبابا غنوج، والفطير. وتقدروا تروحوه من هنا.
مأكولات بحرية:
ابن حميدو
هو مطعم للمأكولات البحرية، موجود في البرشاء، معروف بلمسته العربية المميزة في وصفات مأكولاته البحرية، ومن أشهر أطباقه شوربة ابن حميدو الخاصة، وشوربة الجمبري، وسلطة الكافيار، وكابوريا بالبشاميل، والسبيط المشوي، وشاورما فواكه البحر، والعنوان من هنا.
براكودا
براكودا هو مطعم للمأكولات البحرية، موجود على طريق الشيخ زايد في مبنى مطلوب، معروف بأطباق السمك وفواكه البحر اللذيذة اللي دايمًا بتتوصف إنها طازة، وبيعمل وصفات صحية بطعم أصيل، ومن أشهر أطباقه الكسبرية، ورز الصيادية بالجمبري، وشوربة الكابوريا، والسيزلينج، والسبيط المقلي، وطاجن المأكولات البحرية بالصوص الأبيض. وتقدروا تلاقوه من هنا.