من تشجيع لميمز، تعالوا نشوف رد فعل المصريين بعد هزيمة الأهلي من بايرن ميونخ

إمبارح، وبعد أداء أكتر من مُشَرِف من البطلين الأوروبي والأفريقي، إتهزم الأهلي بهدفين من بايرن ميونخ، وعلى الرغم من إن كتير كان متوقع الهزيمة دي، إلا إن خلال لحظات كتير في الماتش، لاعيبة الأهلي كانت بتدي للمصريين أمل بالتعادل أو الفوز، وده إن دل على شئ، فهو بيدل على مدى تماسك الأهلي كفريق وكخطة قُدام البطل الألماني.

الجونين سجلهم البولندي روبرت ليفاندوفسكي، وبكده يضمن لفريقه التأهل للنهائي، اللي هيتلعب يوم الخميس اللي جاي ضد أونال تيجريس المكسيكي وبطل قارة أمريكا الشمالية، أما الأهلي فهيلعب على المركز التالت في نفس اليوم ضد فريق بالميراس البرازيلي.

وفي أول تصريح بعد الماتش خرج جمال جبر المتحدث الرسمي للأهلي وقال في تصريح إن البطل الأفريقي قدر يقدم أداء جدير بالثناء قدام العملاق البافاري، واعتبار الهزيمة ممكن يكون منطقي وده يرجع لكبر فرق المستوى الفني بين الفريقين.

وقال في تصريح لسكاي نيوز عربية: “نقدر جهود اللاعبين، وقدمنا مستوى مشرف، وكنا نأمل في إسعاد الجماهير بالمدرجات بتحقيق نتيجة أفضل، لكن الفريق الألماني يعد الأقوى في العالم حاليًا، ولا يمكن أن نلوم اللاعبين الآن”.

وكمل وقال بإن اختلاف المستوى الفني بين القارتين بيخلي الحظ حليف فرق القارة العجوز في ماتشاتهم ضد فرق القارة السمراء. وأنهى جبر تصريحاته وأعلن إن بالرغم من الأداء المشرف إلا إن تاريخ الأهلي وعقليته مش هيسمحوا للاعبين ولا للجهاز الفني باعتبار الخسارة من بطل أوروبا نصر، ووعد الجماهير بالميدالية البرونزية اللي ماحصدهاش الأهلي من ساعة بطولة 2006.

ويمكن من أجمل لحظات ماتش إمبارح، لمسات محمد هاني الظهير الأيمن للنادي الأهلي، وقتاله على الكرة، وتركيزه الجبار خلال المباراة.. وبعد الماتش ألفونسو ديفيز لاعب بايرن ميونخ طلب من محمد هاني التي شيرت بتاعه.. أما مدرب بايرن ميونخ هانس ديتر فليك فعلق على لعبه وقال إنه أبهره، ولمح لمستقبل ليه في أوروبا.

عن فيسبوك

كمان حارس المرمى المصري محمد الشناوي أبهر الكل بأداء مشرف وقدر يصد أكتر من كرة صعبة، ويمكن بسبب استمواته في اللعب هو ودفاع الأهلي الفريق المصري ماشالش سكور كبير.

عن: إنستجرام

وبعد الماتش مانويل نوير حارس بايرن ميونخ عمل فولو للشناوي على إنستجرام، وتناقل المتابعين الصور على السوشيال ميديا في جو إيجابي مافيهوش أي نوع من أنواع التعصب الكروي.

أما ردود فعل المصريين فكالعادة امتزجت ما بين الهزار والجد، فالكل كان فخور بأداء نادي القرن وبرجولة اللاعيبة فدام البطل البافاري.

وطبعًا كعادة المصريين كان لازم نشوف هزار وعدد كبير من الميمز على السوشيال ميديا، وقررنا نختار ليكم مجموعة من أفضلهم.

ويمكن كان أحلى تعليقات على الماتش كانت اللي نزلها فريق البايرن نفسه.

يمكن هزيمة الأهلي من بايرن ميونخ كانت تقيلة على الفريق وعلى المصريين بشكل عام والأهلاوية بشكل خاص، إلا إن رجولة اللاعيبة في ماتش إمبارح كانت كافية إنها تثبت للكل إن الجيل ده من لاعيبة الأهلي على قدر من المسئولية ناحية تاريخ فريقهم، وإننا هنستنى منهم بطولات أكتر وماتشات أقوى الفترة الجاية.

آخر كلمة: ماتفوتوش قراءة: بيراميدز والصفقات الكبيرة: ليه التعاقد مع دييجو رولاند صفقة تقيلة؟

تعليقات
Loading...
Tweet
Share
Share
Pin