بواسطة: رحمة حجاج
المهرجانات السينمائية في الوطن العربي في ٢٠٢١ كانت بتواجه تحديات كتير وأهمها كورونا. بس رغم كل التحديات اللي كانت موجودة، مهرجانات سينمائية كتير قدرت إنها تكون موجودة وبنجاح كبير خلال ٢٠٢١ وكمان يبقى في تنافس بينهم. من أهم المهرجانات السينمائية دي: مهرجان القاهرة السينمائي الدولي ومهرجان البحر الأحمر السينمائي الدولي ومهرجان الجونة السينمائي.
مهرجان القاهرة السينمائي الدولي من أهم الفعاليات الفنية العربية والدولية من زمان وبيعتبر دايمًا من أكتر المهرجانات السينمائية اللي منتظمة طول السنين اللي فاتت. مهرجان القاهرة السينمائي الدولي تحدى أزمة كورونا في ٢٠٢١ زيّ ما كانت أزمة برضه بالنسبة للمهرجان في 2020. كورونا بتعتبر أزمة لإن ممكن تتسبب في مشاكل بالنسبة لسفر وتنقل الضيوف. ولو هنقارن بين مهرجان القاهرة السينمائي ومهرجان الجونة أو مهرجان البحر الأحمر السينمائي الدولي، هنعرف إن الميزانية المحدودة من أكبر التحديات اللي بتواجه مهرجان القاهرة السينمائي الدولي بس ده عمره ما كان سبب إن المهرجان مايتعملش في ميعاده. إدارة المهرجان دايمًا بتكون حريصة إنها تطلع مهرجان القاهرة السينمائي الدولي بأحسن شكل ويكون كمان معاصر لكل حاجة بتحصل في الساحة الفنية.
مهرجان القاهرة السينمائي الدولي قدر يكون موجود في ٢٠٢١ في ميعاده اللي بدأ يوم ٢٦ نوفمبر وخلص يوم ٥ ديسمبر، ودي كانت الدورة رقم ٤٣ للمهرجان. فنانين كتير حضروا المهرجان وكمان كان في تسليم جوائز وتكريم لفنانين كتير. من الجوائز دي: جائزة الهرم الذهبي واللي أخدتها الفنانة الكبيرة “نيللي” تقديرًا لمسيرتها الفنية الكبيرة.
كان في تكريمات تانية برضه لصناع السينما في العالم خلال دورة مهرجان القاهرة السينمائي الدولي اللي فاتت. تم تكريم المخرج الفرنسي “تيري فريمو” والمؤلف الموسيقي الهندي A. R Rahman. ده غير إن كان في ندوات كتير وعرض لأفلام لأول مرة في المهرجان، وظهر مهرجان القاهرة السينمائي الدولي بشكل مميز وناجح جدًا في ٢٠٢١ رغم كل التحديات اللي واجهته.
أما بالنسبة لمهرجان البحر الأحمر السينمائي الدولي، فهو كان بيواجه أكبر تحدي في ٢٠٢١ علشان دي كانت أول دورة للمهرجان واللي انطلق من جدة. مهرجان البحر الأحمر السينمائي الدولي هو يعتبر حلم للسينمائيين السعوديين. المفروض إن أول دورة للمهرجان كانت هتبقى في ٢٠٢٠ بس اتأجلت بسبب كورونا. المملكة العربية السعودية قدرت إنها تتحدى جائحة كورونا في ٢٠٢١ وعملت أول دورة للمهرجان بشكل مميز وناجح جدًا.
من أكتر الحاجات اللي ميزت مهرجان البحر الأحمر السينمائي الدولي هي إن إدارة المهرجان قررت تقدير دور المرأة في صناعة السينما، بإن الأفلام اللي كانت من صناعة مخرجات نساء كانت نسبتها ٣٨% من إجمالي عروض المهرجان. مهرجان البحر الأحمر السينمائي الدولي عرض ١٣٥ فيلم من ٦٧ دولة مختلفة، منها ٤٨ يعرض عربيًا لأول مرة، و٢٧ فيلم سعودي، و١٧ يعرض عالميًا لأول مرة. ده غير المسابقات اللي كانت موجودة للأفلام القصيرة وكمان توزيع بعض الجوائز للفنانين. و بكده مهرجان البحر الأحمر السينمائي نجح في إظهار أول دورة له بشكل ناجح جدًا رغم أي صعوبات واجهته.
مهرجان الجونة السينمائي واجه أزمات ومشاكل كتير خلال دورته الخامسة اللي بدأت يوم ١٤ أكتوبر ٢٠٢١. قبل بداية المهرجان بيوم واحد، حصل حريق ضخم في القاعة الرئيسية للمهرجان وكل الناس توقعت إن المهرجان يتأجل بس إدارة المهرجان نجحت نجاح كبير في إنها تتجاوز اللي حصل ورجعت كل حاجة لطبيعتها خلال ساعات فقط.
من الأزمات اللي حصلت في مهرجان الجونة السينمائي، هي أزمة الفنانة “يسرا” مع مدير مهرجان الجونة السينمائي “انتشال التميمي” بعد ما قال في تصريحات إن ماينفعش تكريم الفنانة “يسرا” علشان هي تعتبر واحدة من اللجنة الاستشارية للمهرجان بس تم الصلح بينهم واعتذر “انتشال التميمي” ليسرا أمام الجميع.
“فيلم ريش” كمان من الأزمات اللي حصلت في مهرجان الجونة السينمائي بعد ما حصل جدل كبير بسبب أحداث الفيلم اللي اعتبرها البعض إنها إهانة لمصر. وده كان سبب في إن الفنان “شريف منير” والفنان “أشرف عبدالباقي” والفنان “أحمد رزق” ينسحبوا من عرض الفيلم.
بس مهرجان الجونة السينمائي قدر برضه إنه ينجح ويظهر بشكل مميز رغم كل التحديات والأزمات اللي واجهته.