موسم صيد الريد فلاجز: دليلك علشان تصطاد ريد فلاج، وتعرف تعمل بيه إيه

Determined businesswoman waving flag as symbol of women power

بيقعد على القهوة كتير؟ بينزل الجيم طول الوقت؟ عايز يخرج مع صحابه؟ WTF ريد فلاج طبعًا. كلنا شوفنا حاجات زيّ دي على السوشيال ميديا في الفترة اللي فاتت.

السوشيال ميديا دخلت في ثقب أسود اسمه الريد فلاجز والناس عمالة ترمي على بعض حاجات غريبة وتسميها ريد فلاجز، وناس عمالة تدافع عن نفسها وخايفة حد يشوفه فيها لحسن تتكنسل. بس يعني إيه ريد فلاج أصلًا؟

ريد فلاج يعني حاجة تقول لنا إن الشخص اللي قدامنا ده مش هيقدر يكون شريك يُعتمد عليه في علاقة صحية تحقق للطرفين السعادة. علشان نعرف نحدد الريد فلاجز لازم نفهم التعريف ده كويس جدًا.

يعني التواصل عنصر أساسي في أي علاقة ناجحة ما بين طرفين، وعلشان التواصل يحصل لازم الطرفين يقضوا مع بعض وقت كفاية. ولو في طرف مش قادر يوفر نفسه علشان يدي العلاقة دي الوقت اللي محتاجاه علشان العلاقة تتطور، يبقى ده ريد فلاج واضح لإنه العلاقة دي مالهاش مستقبل.

في المقابل المساحة الشخصية مهمة جدًا، زيّ ما التواصل مع الطرف الأخر مهم وإنكم تقضوا وقت كفاية مع بعض أساسي للعلاقة، برضه حصولك على مساحتك الشخصية وإن يكون عندك وقت تكون فيه لوحدك ده مهم جدًا علشان ماتزهقش وماتحسش بضغط. لو في طرف مش قادر يدي الطرف التاني مساحته الشخصية ومحتاج طول الوقت يكون موجود بشكل مستمر، فده ريد فلاج فتاك.

جزء من التواصل هو إنكم تقضوا وقت كفاية مع بعض بس المهم وأنتم بتقضوا الوقت ده مع بعض إنكم تتكلموا وتتناقشوا في تفاصيل حياتكم وتفاصيل علاقتكم ولو في مشاكل تفضفضوا وتحاولوا تحلوها. لو في طرف مش بيتكلم وبيقفل على نفسه وكل ما تحصل مشكلة يتقوقع حولين نفسه فده ريد فلاج، علشان ده هيخلي التواصل ما بين الطرفين معدوم وبالتالي في احساس بالبعد والتنافر هيبدأ يتكون مع الوقت بالذات إن الريد فلاج ده بيخلي المشاكل تكبر وتتعقد أكتر علشان مش بتتكلموا عنها ومش بتحاولوا تشتغلوا عليها.

مبدأ بسيط: كل اللي يقف في طريق المساواة والسعادة في العلاقة هو ريد فلاج

إذا كان الطرف التاني بيعمل حاجات بتخليك مش سعيد أو بيخلي العلاقة تمشي في طريق مفيهوش مساواة في المتطلبات والواجبات والتوقعات فلازم تعرف إن دي ريد فلاجز وإنك لازم تعيد تفكير في العلاقة دي.

خلي دايمًا مبدأ المساواة في العلاقة شيء أساسي وماتخليش أي حاجة تجبرك تتقبل وضع ماتكونش فيه مساوي للطرف الأخر في كل حاجة. علشان المساواة بتضمن إن مفيش طرف يستغل الطرف التاني أو يعتمد عليه بالكامل في إنجاح علاقة فيخلي العلاقة تستهلك كل طاقة الفرد ده.

أما السعادة في العلاقة فهي المبدأ الأول والأخير. فعلًا لو في طرفين بيحبوا بعض بجد هتعدي عليهم فترات مش هيكونوا سعداء فيها، بس أهم حاجة إننا نقدر نخلي نفسنا مرتاحين مع بعض علشان نتغلب على الأسباب اللي بتحرمنا من السعادة في الفترات دي مع بعض.

طيب بعد ما لقيت الريد فلاجز اللي ماقدرش أتقبلها في شريك، أعمل بيها إيه؟

تعمل إيه بالريد فلاجز دي حاجة ترجعلك وترجع لحكمك على الشخص اللي معاك. يعني هل تقدر تتعايش في علاقة صحية مع المشكلة دي ولا مش هتقدر؟ هل لو كلمت الشخص هتعرف تحل المشكلة دي ولا هتفضل موجودة. بعد ما تجاوب على الأسئلة دي هتعرف تعمل إيه بالريد فلاجز اللي معاك.

آخر كلمة: كل واحد مننا عنده شخصية مستقلة ويقدر يحدد إذا كان الطرف اللي قدامه ينفع شريك يُعتمد عليه ولا لأ، وكل واحد فينا عنده ريد فلاجز مايقدرش يتقبلها في شريك.

تعليقات
Loading...
Tweet
Share
Share
Pin