اتنين من رموز الفن المصري والعربي، الناس كانت بتيجي لهم من أخر الدنيا علشان يحضروا حفلة من حفلاتهم ويسمعوا أصوات ماتكررتش في زمن الفن والموسيقى. ولإن جمهورهم على مدار السنين بيزيد مش بيقل، قرر موسم الرياض إنه يخلد ذكراهم، ويعيش الجمهور تجربة مميزة ماتتنسيش من أجواء حفلاتهم ويفكرهم برحلة حياتهم.
عبد الحليم حافظ
مسرح عبد الحليم كان جزء مميز من فعاليات موسم الرياض في منطقة “بوليفارد رياض سيتي” وكان بحضور عيلة الراحل عبد الحليم، المسرح كان مكون من كذا جزء، منهم قاعة بتضم مقتنيات خاصة به بتعرض لأول مرة من أشهر حفلاته وأفلامه ومقابلاته، وأكتر من 100 رسالة مكتوبة من المعجبين والأصحاب، وآلات موسيقية مش موجودة غير في زمنه، وفي جزء من المسرح عبارة عن مطعم وقهوة كل ديكوراته مستوحاة من فكرة النوستالجيا وفي صور نادرة للعندليب، ده غير إن المسرح نفسه هيعيشك تجربة الفن الأصيل من أغاني عبد الحليم حافظ، بالإضافة لمسرحية “حبيبتي من تكون” واللي بتعرض قصة حياة العندليب الأسمر.
أم كلثوم
عظمة على عظمة ❤️
كوكب الشرق .. قريبًا في #موسم_الرياض ✨pic.twitter.com/BeRKjbh2MS— موسم الرياض | Riyadh Season (@RiyadhSeason) November 5, 2021
أعلنت هيئة الترفيه السعودية وتركي آل شيخ عن حفلة خاصة في منطقة بوليفارد سيت، هتكون بطلتها كوكب الشرق أم كلثوم بتقنية الهولوجرام، وظهرت من خلال الفيديو الترويجي وهي بتقول جملتها الشهيرة “الحب مش لحاجة واحدة، الحب للوالدين، الحب للعيلة، الحب للوطن وللأصحاب، هو حلقة مفرغة مابتنتهيش وعمره ما كان لحاجة واحدة أبدًا”
العندليب وكوكب الشرق حالة فنية مش هييجي زيّها
إنك تعمل حفلة لنجوم مابقوش موجودين معانا وبتراهن على نجاح التجربة وواثق إن الجمهور هييجي من كل الدول العربية وجاليات بعدد كبير، الثقة دي ماجاتش من فراغ، جات من اسم ونجاح طويل وفن حقيقي لمس قلوب الناس لفنانين كان لهم تاريخ طويل وقدروا بأغانيهم وإحساسهم إنهم يوصلوا لأجيال وأجيال، ولسه لما حد بيبقى عايش في حالة حب أول حاجة بيجري عليها هي أغانيهم ويقول “الله.. كمان ياست” و” عظمة على عظمة”.
لما كنا بنشوف حفلاتهم زمان، ونلاقي الناس اللي بتحضر وهي منفعلة مع كل كوبليه بيقولوه، ونلاقي الرجل اللي عمره أكتر من 70 سنة وهو واقف بيسقفلهم من غير حتى ما الأغنية تخلص ببساطة لإنه كان”متسلطن” من اللي بيسمعه، ولما تشوف جنازاتهم كانت عاملة ازاي، وقد إيه كانت كل واحدة منهم كانت بمثابة جنازة شعبية حارة مش هيتعمل زيّها تاني لأي فنان، ونافست جنازات رؤساء في تاريخ مصر، هتعرف بعد كل ده إننا كنا قدام حالة فنية فريدة لاتنين من أهم نجوم وفنانين ومبدعين الوطن العربي، ومش غريبة أبدًا لما تلاقي ناس جاية من آخر الدنيا علشان تشوف حاجة تخصهم أو يسمعوا بس أغنية لهم.
أخر كلمة:ماتفوتوش قراءة: إحياء زمن الفن الجميل: إقامة حفل غنائي بتقنية الهولوجرام لعبد الحليم حافظ