من البغل للمجنون: أغرب أسماء مطاعم في مصر

سهل تلاقي حاجات غريبة وغير منطقية بنعملها في حياتنا اليومية، زيّ ما تقول كده خلاص جالنا تناحة من الحاجات الغريبة، مابقيناش نتفاجئ أو نستغرب منها، وبقى عندنا اختيارات عشوائية وصلت لاختيار أسماء المحلات والمطاعم، يعني بقى طبيعي جدًا تقول لواحد صاحبك “ما تيجي نروح ناكل عند البغل” أنت كده مش بتشتم واحد صاحبكم بتفكروا تتغدوا عنده، لأ ده اسم مطعم مشهور.

البغل

عن: menu

سلسلة محلات فول وطعمية في مصر، بدأ بمحل صغير في المحلة، وتوسع لحد ما بقى عنده محلات في مناطق مختلفة في المحلة نفسها، ووصل كمان للعاصمة وللمنصورة، وعدى حدود مصر ووصل للسعودية كمان.

والحقيقة إنه له قصة كفاح في 100 سنة، لكن الاسم الغريب كان هو اللي له النصيب في الشهرة، من كتر ما هو غريب، بس مديرة سلسلة محلات البغل قالت في لقاء سابق مع الإعلامي “محمود سعد” إن سبب شهرة المحل وجودته هو إنهم بيعتمدوا على الفول المصري مش المستورد، رغم ندرة وجوده، لكنهم أصروا على الاستمرار في ده لإن حلاوة الفول البلدي المصري هي سر الإقبال الشديد على المطعم.

الاسم الغريب جيه منين؟ هو لقب العائلة، اللي ابتدت سلسلة المحلات من محل فول وطعمية صغير في المحلة، واختاروا إن المحل يشيل نفس لقب العائلة.

المجنون بمزاجه

مش قادرين نحدد الإعلان اللي شوفناه على صفحة المغنية مريم صالح ده حقيقي ولا لأ، بس هي نزلت بوست بتقول إنها فتحت محل كشري اسمه “المجنون” ومش قادرين نحدد سبب التسمية إيه، بس هو نجح في لفت الانتباه، وطبعًا مريم ماسلمتش من تعليقات الناس، اللي دمجت بين أغانيها وبين مكونات الكشري.

سواء المحل فعلًا بتاع مريم صالح أو لأ، لكن هو موجود على أرض الواقع مش مجرد مزحة إلكترونية.

الجحش

في قلب السيدة زينب، من أكتر من 65 سنة، ابتدت عربية فول واتشهرت لحد ما ربنا كرمهم والعربية بقت محل فول وطعمية، وأخد شهرة كبيرة، وبقوا الفنانين بيروحوا ياكلوا هناك من وقت للتاني. “الجحش” كمان باسم لقب عائلة مؤسسيه، “مالناش فروع في حتة تانية، والعربية موجودة كانت وش الخير علينا”، ده اللي قاله شيف في “الجحش”.

زيزو نتانة

عادل إمام ماكانش بيهزر وهو بيقترح على ولاده يروحوا ياكلوا عند زيزو نتانة، في مطعم فعلًا اسمه كده، ده مش مجرد إفيه من وحي خيال الزعيم، عربية كبدة لعم “عبد العزيز حمزة”، سماها على اسم الدلع “زيزو” لكن إفيه الزعيم هو سبب اللقب ده، وكمان سبب زيادة شهرة عربية الكبدة نفسها بالشكل ده، واللي بقت دلوقتي محل كبير، وعندهم هتاكل “سندوتشات عجب” زيّ ما قال عادل إمام.

جريمة أكل

قلشة ممكن تتقال في وقفة على الناصية، بس صاحب المحل ده استغلها على نطاق أوسع وسمى المحل “جريمة أكل” وواخد الموضوع بجد، وبيقول لك الأكل للجدعان، وبيحسسك إنك داحل خناقة مش داخل تاكل سندوتشين عادي وتتكل على الله.

المطعم بيعمل جرايم زيّ الحواوشي والكبدة والسجق، وموجود في أول مكرم عبيد في مدينة نصر.

آخر كلمة: ماتفوتوش قراءة: 9 من أهم مطاعم الأكل المصري اللي هتلاقيها في القاهرة

تعليقات
Loading...
Tweet
Share
Share
Pin