مع دخول فصل الخريف: إزاي تشتروا ملابس أقل وتستفيدوا بيها في أكتر من طقم؟

مع دخول فصل جديد من السنة، ونزول ستايلات وموديلات جديدة مناسبة ليه، كتير مننا بيروحوا يشتروا هدوم كتيرة بمبالغ كبيرة على الرغم من إننا ممكن نشتري كام قطعة أساسية نقدر نستخدمها بأكتر من شكل وفي أكتر من مناسبة. وبدل ما بنشتري هدوم كتيرة ومش بنستعملها كلها أو بنلاقيها متكررة ومشابهة مع قطع مركونة في دولابنا، هنقولكوا إزاي تقدروا ترشدوا استهلاكوا للملابس وتوفروا فلوسكوا في نفس الوقت اللي هتبقوا فيه على الموضة وبتجددوا الاستايل بتاعكوا باستمرار.

عن: pexel
  • وأنتوا بتشتروا لبس جديد، حاولوا دايمًا تركزوا على القطع الأساسية اللي ناقصاكوا، زي التيشيرت الأبيض أو الأسود اللي ممكن ننسقهم مع أغلب الأقطم. وبالنسبة للبنطلونات بردو لازم تجيبوا البنطلون الأسود لأنه اساسي لكل الأطقم مهما كانت خامتها أو لونها.
  • بالنسبة لهدوم الخريف، كفاية إنكم تشتروا جاكيت خفيف وبلون بتحبوه بحيث ينفع تنسقيه مع أي تيشيرت وبنطلون بكذا طريقة، زي مثلًا إنه يتلبس مع تيشيرت سادة وبنطلون جينز، ومرة تانية يتلبس مع بنطلون قماش واسع، وتيشيرت عليه نقوش أو رسوم، أو تيشيرت مخطط مثلًا.
  • متنسوش تشتروا جاكيت جينز للخريف لأنه بيكون مناسب للجو المعتدل في الفصل ده، وهيناسبكوا في أكتر من طقم لأنه كمان عملي جدًا وهتقدروا تستخدموه في أي مشاوير.
  • ولو بتحبوا الفساتين، متنسوش تختاروا فستان خريفي بالشكل اللي بتحبوه سواء منقوش أو سادة وبأي قصة بتريحكم، وتقدروا تغيروا من شكله في اللبس بسهولة لو لبستوا عليه جاكيت جينز مثلًا أو غيرتوا الإكسسوارت اللي بتلبسوها معاه باستمرار.
  • البنطلونات الجينز بستايل boyfriend أو mom fit كمان بيغيروا من شكل الطقم في كل مرة بتلبسوه معاه سواء كان بلوزة أو تيشيرت أو جاكيت خريفي خفيف.
  • إحنا ممكن كمان نستخدم نفس القطعة في مناسبات مختلفة لو غيرنا حاجات بسيطة في باقي الطقم والإكسسوارات، وبالشكل ده هنقدر نلبسها بشكل كاجوال مرة وفورمال مرة تانية، وكمان ممكن على البحر، ودي فيديوهات بتوضح إزاي نستخدم القطعة الواحدة في أكتر من ستايل عن طريق تغيير شكلها بطرق بسيطة تدينا نتايج مختلفة.

البنطلون الأبيض الواسع كمان من القطع الجميلة واللي على موضة و بيدي شكل مختلف للطقم، ودي طرق لتنسيقه بأكتر من شكل.

آخر كلمة: قولولنا إيه هي القطع الأساسية بالنسبالكم وبتنسقوها إزاي مع بقيت ملابسكم؟

تعليقات
Loading...
Tweet
Share
Share
Pin