مع أو ضد تصريحات رضوى الشربيني عن المحجبات؟ جدل كبير على السوشيال ميديا بعد إحالتها للتحقيق

بعد ما اتكلمت رضوى الشربيني في برنامجها “هي وبس” عن البنات المحجبة وقالت تصريحات اعتبرها كتير من الناس مثيرة للجدل زي قولها إن “اللي مش محجبة شيطان نفسها أقوى من إيمانها وقوتها”، قرر المجلس الأعلى للإعلام إحالتها للتحقيق للتميز ضد غير المحجبات، والموضوع ده أثار جدل كبير على السوشيال ميديا.

عن: يوتيوب

الناس اتداولت الفيديو اللي فيه التصريحات، واختلفت آرائهم ما بين مؤيد ومعارض، ففي اللي شافوا إنها بتتكلم صح، وإنها بتدافع عن المحجبات وعن الحجاب بشكل عام في وسط ناس كتير بتعارضه وأماكن بتمنع دخول المحجبات، وانتشرت كمان صور وهاشتاجات زي هاشتاج #ادعم-رضوي-الشربيني من أصحاب الرأي ده ودعموها بشكل كبير فيه.

 ومن ناحية تانية، في ناس شايفين إنها غلطت في غير المحجبات، وإنها بتحكم على الأشخاص بطريقة لبسهم، وبتقرر مين أحسن عند ربنا، وبتشجع على العنصرية ضد غير المحجبات، وتصنيف الناس على أساس شكلهم ولبسهم أو حتي ديانتهم.

 وكمان ناس كتيرة اتركزت تعليقاتهم على الموضوع في مطالبة رضوى بإنها تكون محايدة أو تاخد بالها أكتر من طريقة طرحها للموضوعات، خصوصًا إنها ليها جمهور كبير بيتابعها، وإنها شخص مؤثر على فئة كبيرة من البنات. فالفيديو خلق آراء كتير وسبب جدل بين مُختلف الفئات، وحول المذيعة نفسها للتحقيق العاجل من المجلس الأعلى للإعلام، ولسة لحد دلوقتي مش معروف التحقيق هيتم إمتى أو هيخلص الموضوع على إيه.

آخر كلمة: شاركونا بآراكم في التعليقات..

تعليقات
Loading...
Tweet
Share
Share
Pin