لكل اللي بيحب التاريخ والفنون، أكيد الخبر ده هيكون سعيد جدًا بالنسبة ليكم. بكرا الموافق 15 سبتمبر، هتنطلق فعاليات معرض كنوز متاحفنا الفنية “مختارات من الفن الأوروبى” وهيتفتح قصر عائشة فهمي بالزمالك من الساعة 9 صباحًا للتاسعة مساءً كل أيام الأسبوع ماعدا يوم الجمعة، وهيستمر المعرض حتى يوم السبت الموافق 31 أكتوبر.
دي هتكون الدورة الخامسة للمعرض اللي بيضم أكثر من 100 عمل فنى من مقتنيات متحف الجزيرة ومتاحف تانية، ده غير المنحوتات اللي موجودة وبتجسد فنانيين عالميين من القرن ال19، واللي هتدي فرصة للزوار علشان يتعرفوا على ممثلين وشكل الفنون الأوروبية القديمة عن قرب.
الزيارات هيكون مُتاح فيها أنواع مختلفة من الفنون، والقصر لوحده بيعتبر تحفة فنية، لأنه بيطل علي النيل مباشرًة، وبيتكون من طابقين، وحوالي 48 غرفة بشبابيك مزخرفة ومعشقة بالرصاص. وتاريخ القصر مميز جدا لأنه بيرجع لعائشة فهمي اللي أشترت حصة أخواتها فيه بعد وفاة والدها وبقى ملكها لوحدها، واتجوزت فيه يوسف بك وهبي وقضت معاه كل سنوات جوازها في القصر حتي طلاقهما، وبعد كده أممت الحكومة المصرية القصر، وفضل مهجور لفترة طويلة لحد ما تم تحويله لمجمع للفنون.
الطابق الأول من القصر بيضم الغرف المخصصة لعرض لوحات الفن التشكيلي، أما الطابق الثاني ففيها الغرف ذات الطابع الأثري، ومن ضمنها الغرفة اليابانية اللي صُممت وأُهديت مخصوص لعائشة فهمي، فهتلاقوا على حوائط الغرفة بعض الكلمات والصور اليابانية. ودي كمان بتُعتبر فرصة ذهبية لكل اللي بيحبوا ياخدوا صور، سواء لنفسهم أو للأماكن الأثرية.