خلال مؤتمر لوزراء التعدين العرب في الرياض. أعلن وزير البترول المصري طارق الملا عن مشروع بيتم العمل عليه في الوقت الحالي. وهو تنفيذ أول مصفاة للذهب معتمدة في منطقة مرسى علم بالصحراء الشرقية. طب ده معناه إيه؟
في البداية الهدف من المشروع ده هو إن مصر عايزة تستفاد من القيمة المضافة لموارد الدهب. وإن المنجم الوحيد المنتج للذهب في مصر هو “السكري” وبدأ إنتاجه الاقتصادي في 2015. وبيعتبر واحد من أكبر 20 منجم على مستوى العالم.
وبحسب تصريحات أستاذ الهندسة والبترول جمال القليوبي لسكاي نيوز قال إن مصر بينقصها حاجتين: الأولى هي إنشاء مصفاة للذهب. خصوصًا إن مصر كانت بترسل الذهب للمعامل خارجية علشان يعيدوا صهره وتجميعه.
والحاجة التانية هي وضع مصر في الاعتبار إنه يكون لها مخزون استراتيجي من مقدرات الدهب محليًا. بشكل يتماشى مع المخزون الاستراتيجي للعملة الدولارية. علشان كده بتسعى إنها تضاعف المخزون ده. من خلال شركات بتبحث وتنقب على مخزون الدهب المحلي المتاح على أرض مصر.
طب وليه منطقة الصحرا الشرقية بالذات؟
بتعتبر المنطقة دي من أهم المناطق المؤثرة بالنسبة للذهب في مصر. خصوصًا بعد عملية تقسيمها لـ 38 قطعة بمساحة 12 ألف كيلو متر مربع. وإن مصر بتنتج سنويًا من خلال المنطقة دي ما يقارب من مليون ونص أونصة من الدهب. ده غير إن مصر بتخطط لمشروع المثلث الدهبي اللي هيتعمل على مساحة 2.2 مليون فدان في قنا وسفاجا. وعلى ست مراحل وهيستغرق المشروع ده 30 سنة علشان يتم الانتهاء منه بالكامل.
ومن ضمن الحاجات الإيجابية اللي اتعملت، تطبيق قانون جديد من المادة 197 المعدلة لسنة 2017. وده ساهم في تقييد عمليات البحث والتنقيب غير المشروعة عن الذهب. واللي كان بينجم عنها مشاكل كبيرة لإنها كانت بتتم بأساليب بدائية ومواد خطرة بتعرض حياة الناس للخطر.