بواسطة: ساره علي
في ذكرى ميلاد سمير يوسف غانم أسطورة الكوميديا، فطوطة، سمورة. سمير غانم فرد من كل أسرة مصرية، وهو الفنان اللي كان قادر يضحك الشعب المصري كله. 60 سنة في المجال الفني قدم فيهم 400 عمل سينما وإذاعة ومسرحيات ومسلسلات. كمان (خلي بالك من زوزو، المذنبون) اللي شارك فيهم من ضمن قائمة أفضل 100 فيلم في تاريخ السينما المصرية سنة 1996.
سمير مش بس ضحك الشعب المصري كله، لكن كمان راهن إنه يقدر يبكي الجمهور زيّ ما ضحكه. وقدم سمير غانم عملين من النوع التراجيدي، كان بعيد فيهم عن الكوميديا. وفي مسلسل شربات لوز كسب الرهان بشخصية حكيمو، وزيّ ما قدر إنه يضحكنا كمان كان قادر يبكينا. بس وجهة نظره كانت إن الجمهور مش ناقص حزن وإنه بيحب الضحك بطبيعته وبيحب يشوف الناس مبسوطة. قد إيه سمير غانم مأثر في حياتنا وإنه رغم رحيله عن عالمنا لكن أعماله خالدة وقادرة تكون سبب في إبتسامة كل الأجيال.
بداية سمير غانم وثلاثي أضواء المسرح
بداية سمير غانم كانت من مسرح الجامعة، كان طالب بكلية زراعة جامعة إسكندرية، ومن هنا بدأ مشواره الفني. قابل سمورة الفنان جورج سيدهم والضيف أحمد علشان تتشكل أشهر فرقة فنية “ثلاثي أضواء المسرح”. وهو فريق غنائي كوميدي تميز جدًا في الوسط الفني وحققوا نجاح باهر من خلال الإسكتشات الكوميدية، أشهرها (روميو وجوليت وطبيخ الملايكة). ده غير الأفلام والمسرحيات الناجحة. الفرقة استمرت في نجاح لحد ما ودعنا الفنان الضيف سنة 1970. وبعدها شوفنا سمير غانم وجورج سيدهم في مسرحيات كتير وأشهرها (المتزوجون).
فطوطة
“فطوطة” اللي طوله قصير شويتين ببدلته الخضرا الواسعة وشعره الأسود المنكوش والبيبيون الأسود الكبير وجزمته الصفرا، عمرك ما هتنساه مهما الوقت عدا وهنفضل فاكرينه. ده حتى صوت فطوطة وهو بيقول “فطوطة مخرج أنتيكة اتعلم سيما في أمريكا يرقص تانجو وشيكا بيكا” لسه في دماغنا لحد دلوقتي. فطوطة من أنجح الفوازير الكوميدية اللي اتعرضت خلال شهر رمضان، واللي بيحبها الكبار قبل الصغيرين. مفيش بيت مصري مايعرفش (فطوطة أو سمورة)، الشخصيتين اللي ابتكرهم الفنان سمير غانم، واللي استمروا لأكتر من موسم. فوازير فطوطة، فطوطة حول العالم، فطوطة وتيتا مظبوطة، كلها أعمال مش هنقدر ننساها دخلت البهجة على البيوت ولحد دلوقتي بنتفرج عليها.
سمير غانم والعيلة
قصة زواج دلال وسمير من أشهر القصص المعروفة بالوسط الفني، وبعد ما كان سمورة أشهر عازب في الوسط الفني في الوقت ده، بقى هو ودلال من أشهر ثنائي متزوج في الوسط. فالفنانة دلال زيّ ما قالت قبل كده في حواراتها في البرامج إنها مش مكسوفة علشان تقول إنها لعبت دور كبير إن علاقة الحب دي تنتهي بالجواز خصوصًا إن سمورة بيخاف من الارتباط وفكرة الجواز. وبعد إنجابهم لدنيا وإيمي، اكتملت العيلة الفنية. دنيا وإيمي وارثين الموهبة كاملة من والدهم ووالدتهم ومتشبعين بالفن. وعلشان كده أعمالهم دايمًا مميزة ومليانة شطارة واحتراف. سمورة كان بيقول في حواراته إنه فخور ببناته وبيكون مبسوط أكتر لما يظهروا قبله على الأفيش.
بعد وفاة الفنان سمير غانم والفنانة دلال، الشعب المصري كله عاش حالة من الحزن على فراقهم وخصوصًا بناته. وفي عيد ميلاد الفنان الراحل، كتبت دنيا على صفحتها على الإنستجرام “كل سنة وأنت طيب يا حبيبي وروحي، ربنا يرحمك ويغفرلك ويااارب تكون سعيد ومرتاح زي ما كنت طول حياتك بتسعد الناس كلها.. بحبك ومعايا في كل لحظة عيد ميلاد سعيد في الجنة يا رب” أما الفنانة إيمي عبرت عن نفسها وقالت “الله يرحمك ويغفرلك يا رب وأشوفك في الجنة أنت ومامي ونحتفل معاكوا زي كل سنة” وكمان طلبت من اللي يشوف البوست يقرأ الفاتحة. احنا كمان بنقول له كل سنة وأنت طيب ووحشتنا يا سمورة.
