من أول لما بتبدأ تكبر وأنت بتمشي في دايرة من القرارات مش بتنتهي، حياتك كلها بتبقى عبارة عن مجموعة من القرارات بتاخدها وأنت ماشي في طريقك، بس أحيانًا في معظم الأوقات بتحتاج دعم من أهلك أو من الناس القريبين منك، خصوصًا لو قرارات تخص مستقبلك وحياتك لبعدين، ومن ضمن القرارات دي:
إنك تقرر تكمل برا بلدك
قرار مش سهل إنك تاخده لوحدك، خصوصًا لو المدة اللي ممكن تقعدها برا كبيرة، ولأهمية قرار زيّ ده في حياتك، وازاي ممكن يأثر عليها بعدين بالسلب أو بالإيجاب، بنبقى محتاجين دعم أهالينا في قرار زيّ ده، ولو قابلوا القرار باعتراض بنبقى محتاجين منهم يبصوا للموضوع من وجهة نظر تانية.
إنك تختار تخصصك الجامعي
المرحلة دي ناس كتير بتشوفها مصيرية في حياتهم، لإن على أساسها بيتحدد حاجات كتير في مستقبلهم بعدين، وفي أهالي بتضغط على أولادهم في إنهم يختاروا تخصص معين ممكن يكون بعيد على ميولهم، وأهالي تانية مش بتدخل في الموضوع خالص وبتسيب حرية الاختيار لأولادهم، بس من الأفضل إنهم يقدموا الدعم في موقف زيّ ده، بمعنى إنهم يبقوا في الوسط، ينصحوهم بخبرتهم في الحياة وفي نفس الوقت مايسيطروش على رأيهم.
قرار إنهاء أي علاقة مؤذية
علاقات كتير ممكن تعدي علينا في حياتنا وتبقى سامة ومؤذية، واللي بسببها ممكن ناخد قرار زيّ الانفصال أو الطلاق، ساعات ممكن قرار يتقابل بهجوم أو رفض من الأهل، والشخص وقتها بيلاقي نفسه مضغوط من الناحيتين، ولإن المرحلة دي بتبقى حساسة جدًا في حياة الشخص، لازم الأهل يبقوا أول ناس يعرفوا ازاى يقدموا المساعدة والدعم لأولادهم، علشان يعدوا منها بأقل الخسائر الممكنة.
إنك تروح لدكتور نفسي
أهالي كتير ممكن ماتتقبلش إن أولادهم يروحوا لدكتور نفسي، مع إن الطب النفسي بقى زيّه زيّ أي علاج ومهم إن كلنا نعدي بيه، فلو حد قال إنه محتاج يتواصل مع دكتور، لازم تدعمه في قراره ده وماتحاولش إنك تشككه، لإنك ممكن تكون كده بتؤذيه مش بتساعده.
قرار اختيار شكلك
المجتمع والسوشيال ميديا دلوقتي بقوا يحطوا معايير للجمال وللشكل اللي المفروض نبقى عليه، والموضوع بقى مرهق نفسيًا لكل الناس، فلازم تقدم الدعم النفسي لأولادك على أي شكل هما اختاروا يبقوا عليه، واللي مش لازم أبدًا يبقى على نفس معايير السوشيال ميديا أو المجتمع، ومش بس كده، لازم تديهم ثقة في نفسهم.
أخر كلمة: ماتفوتوش قراءة: 6 علامات بتقولك “اهرب، أنت في علاقة مسمومة”