حكاية أشهر إيفيهات لسه معلقة معانا لفؤاد المهندس

إيفيهات أو قفشات، الاتنين حرفة بيعرف يتقنها كاتب السيناريو وبيعرف يؤديها الممثل، بس مش أي ممثل يقدر يرمي الإيفيه بالشكل اللي يعلق معانا ونفضل نفتكره بيه، وفؤاد المهندس كان من أكتر الفنانين اللي بيعرفوا يرموا الإيفيه صح، وإلا ماكانش هيعرف يعلق معانا ونفتكره لحد دلوقتي، وفي ذكرى وفاته حبينا نفتكر أشهر إيفيهات له.

بلاها نادية خد سوسو

مسرحية “سك على بناتك” كانت من أشهر مسرحياته ومشاهدها لسه لحد دلوقتي معلقة معانا وكانت مليانة بالإيفيهات، وكان من أشهرها “بلاها نادية خد سوسو” لما كان بيساوم على بناته علشان يقنع تلميذ عنده في الجامعة إنه يتجوز واحدة فيهم.

كنتي سيبيه يمسكها يا فوزية!

ومانقدرش ننسى الإيفيه التاني واللي بيتكرر لحد دلوقتي وبيتحط “كابشن” في أي مناسبة أو فرح “خليه يمسكها يا فوزية” لما بنته فركشت الجوازة علشان خطيبها مسك إيدها.

المكنة طلعت قماش!

ودي بتتقال بعد ما تفشل في تحقيق هدفك أكتر من مرة بس بتوصل في النهاية، إيفيه “المكنة طلعت قماش” كان أكتر حاجة معبرة عن رد فعل فؤاد المهندس “سبعاوي” في فيلم “عائلة زيزي” لما اختراعه نجح بعد سنين والمكنة طلعت قماش.

ومع ذلك نشلت الفانلة.. ازاي ماعرفش!

“قميص كان فيه 6 زراير، وجرفتة مربوطة وسديري وجاكتة مقفولة، ومع ذلك نشلت الفانلة ازاي مااااااااعرفش!

بهجت قمر وسمير خفاجي قدروا يحولوا مسرحية  “بجماليون” للكاتب الكبير برنارد شو لمسرحية كوميدية من الطراز الأول، كان فيها شويكار حرامية بتقوم بسرقة فانلة فؤاد المهندس ومن بعدها بيقول الجملة دي.

القانون مفيهوش زينب

إيفيه بس من نوع الكوميديا السوداء، جملة قالها فؤاد المهندس في مسرحية “أنا وهو وهي” وفضلت معلقة مع الجمهور وبقت رمز للعدالة، لإن شخصية زينب كانت رمز للواسطة وسرقة وانتهاك حقوق الغير، فلما القانون ينسى زينب ساعتها بس هتتحقق العدالة.

إيفيهات كتيرة نقدر نتكلم عنها لفؤاد المهندس بس الأكيد كان في موهبة جبارة واستثنائية ورا كل ده، واللي خلته يبقى “أستاذ الكوميديا”.

أخر كلمة: ماتفوتوش قراءة: في ذكرى ميلاد الغائب الحاضر علاء ولى الدين: بنفتكر مع بعض أسباب حبنا الدائم ليه

تعليقات
Loading...
Tweet
Share
Share
Pin