مستشفى صحة الافتراضي: أول مستشفى أونلاين في السعودية بيخدم نص مليون مواطن

أطلقت السعودية، يوم الإثنين، أول مستشفى أونلاين في المملكة، مستشفى صحة الافتراضي، واللي بيتعاون مع شبكة من أكتر من 130 مستشفى داخل المملكة، وبتخدم عدد كبير من التخصصات النادرة، بهدف تسهيل الحصول على الخدمات الصحية التخصصية، في الوقت المناسب ولكل المناطق.

وأطلق وزير الصحة فهد الجلاجل، ووزير الاتصالات وتقنية المعلومات المهندس عبد الله السواحة، ومحافظ الهيئة العامة للحكومة الرقمية المهندس أحمد الصويان، المستشفى الأونلاين، وعملوا جولة في أقسام المستشفى، وجربوا مجموعة كبيرة من الخدمات اللي بتتقدم للمرضى، وسمعوا شرح مفصل عن طبيعة وطريقة عمل كل الخدمات.

وقال وزير الصحة إن المشروع هيستوعب حوالي 500 ألف مستفيد في السنة، وبيقدم 34 تخصص دقيق وفرعي، وهيسهل على المواطن الحصول على الاستشارات الطبية، والتوصل لحلول كتير ممكن توفر عليه تعب المشوار للمستشفى، من خلال التواصل مع الأطباء عن بُعد، بالإضافة لنقل الخبرات بين الدكاترة والمختصين، وتوفير أفضل الاستشاريين في جميع المدن والقرى من خلال تقنية “الطب الاتصالي”.

وأكد محافظ هيئة الحكومة الرقمية إن افتتاح مستشفى “صحة الافتراضي”، هو انعكاس لمستوى التقدم في رحلة التحول الرقمي داخل المملكة، والتكامل الحكومي، بالإضافة لموثوقية البنية التحتية الرقمية.

المستشفى اللي يعتبر الأكبر من نوعه في العالم، بيقدم أكتر من 30 خدمة صحية، منها الأشعة الأونلاين والرعاية المركزة وخدمات أونلاين للمرضى اللي عندهم كهرباء زايدة في المخ، وبيشتغل في المستشفى أكتر من 73 ممارس صحي في التخصصات المختلفة، والخطوة دي جزء من برنامج تحول القطاع الصحي للعالم الرقمي ودعم الابتكار واستخدام التقنيات الجديدة، وتعزيز كفاءة الإنفاق، ضمن رؤية السعودية 2030.

هيكون مستشفى “صحة الافتراضي” مسئول عن ربط شبكة كبيرة من المستشفيات المركزية والطرفية المنتشرة في السعودية، وهيغطي نقص التخصصات الدقيقة على حسب الحالة المرضية اللي بتوصل له، وهيتعامل مع الحالات اللي محتاجة تدخل أكتر من تخصص واحد، من خلال طلب الخبراء أونلاين، وهيشارك في الـ guidelines التوجيهات الضرورية علشان الطبيب يقدر ياخد قرار طبي، وهتقدم الخدمة للمستشفيات والأفراد، حسب طبيعة الحالة المرضية، والخدمة المطلوبة.

ووضح مساعد وزير الصحة للخدمات العلاجية والمتحدث الرسمي الدكتور محمد العبد العالي إن المستشفى الافتراضي هيكون زيّ منطقة لجذب خبرات أفضل الاستشاريين، والممارسين الصحيين، وأكتر خبراء عندهم علم في التخصصات النادرة والمعقدة، علشان يقدموا أفضل الخدمات لكل المواطنين، وهيستفيد المواطنين في كل المناطق من الخدمات اللي بيقدمها المستشفى واللي هتبقى إما مباشرة لرعاية وخدمة المستفيد اللي محتاج رعاية وبيقدمها المستشفى بخصوصية، وإما من خلال دعم المنظومة اللي بتخدم المستفيد صحيًا.

وأكد العبد العالي إن اللي بيتقدم في المستشفى الافتراضي هو حاجة مختلفة وجديدة، من حيث التقنيات في طريقة تقديم الخدمات وتسهيل الحصول عليها، ودعم منظومة المنشآت الصحية.

وبدأ مستشفى صحة الافتراضي، في تقديم خدماته، بهدف خلق قيمة مضافة في مستوى الخدمات الصحية وجودتها، واللي شهدت، عالمياً، نمواً في استخدام التقنيات الحديثة، والتوسع في توظيف الروبوتات الطبية واستثمارها، علشان توفر الوقت والجهد ولتخفيف تعب السفر، وللحالات الحرجة اللي محتاجة استشارات متخصصة ودقيقة وسريعة مع تسهيل توفير الخدمات الصحية في البيت.

آخر كلمة: ماتفوتوش قراءة: اكتشاف أثري كبير في معبد الأقصر والآثار: إنجاز حضاري

تعليقات
Loading...
Tweet
Share
Share
Pin