متحف الحضارة هيعرض كل الأزياء والإكسسورات اللي شوفناها في موكب المومياوات

تخليدًا للحدث الضخم، حدث نقل المومياوات الملكية اللي حصل في أبريل اللي فات، وزارة السياحة والآثار المصرية قالت في بيان رسمي على صفحتها الشخصية، إن متحف الحضارة هيعرض كل الأزياء والإكسسوارات اللي تم استخدامها في الحدث واللي انبهرنا كلنا بيها.

وقال الدكتور أحمد غنيم الرئيس التنفيذي لهيئة المتحف القومي إن فكرة عرض كل القطع دي تعتبر من ضمن الأفكار الجديدة اللي طرحتها إدارة المتحف، علشان تطور من المتحف وتجذب عدد أكبر من الزوار من اللي تابعوا الحدث واللي مهتمين بالأزياء.

متحف الحضارة اللي في الفسطاط هيعرض أربع قطع من الأزياء اللي شوفناها في الموكب، واللي تم تصميمها على أيد مصممة الأزياء مي جلال والمصمم خالد عزام، بجانب النوتة الموسيقية والعصا الخاصة بقائد الأوركسترا اللي أبهرنا وأبهر العالم بموسيقى وأغاني هزت قلوبنا كلنا، وعبرت عن مصر وتاريخها قدام العالم كله،

وقبل كده شوفنا جهود من الدولة والوزارة علشان تخلي الحدث يفضل في الأذهان للأجيال اللي جاية، وكانت أخر حاجة اتعملت هي إصدار عملات تذكارية فضة من فئة 100 جنيه بشعار احتفالية الموكب، وعملات معدنية قابلة للتداول من فئة الجنيه والـ 50 قرش بنفس التصميم.

موكب عظيم يليق بالملوك والملكات، تم التحضير له من قبل 1600شخص على مدار شهور بتقنيات وتجهيزات من أحفاد مايقلوش عظمة عن أجدادهم، حدث زيّ ده كان لازم نفضل فاكرينه ونفتخر بيه، دلوقتي والسنين اللي جاية.

أخر كلمة: ماتفوتوش قراءة: توثيقًا لموكب المومياوات الملكية: إصدار عملات تذكارية بشعار الاحتفالية

تعليقات
Loading...
Tweet
Share
Share
Pin