مبادرات من مطاعم لدعم ودمج أصحاب الهمم في الوظائف المختلفة

بشكل لطيف، شوفنا مبادرات من مطاعم كبيرة بفروعها في مصر، بتقدم فرص للتدريب وكمان وظائف لذوي الاحتياجات الخاصة من الصم وضعاف السمع، وذوي اضطراب طيف التوحد، علشان يساعدوا بشكل أكبر على أرض الواقع في دمجهم في المجتمع بشكل طبيعي، وتوفير وظائف مختلفة لهم حسب ميولهم، وإنهم يتعلموا مهارات جديدة ومختلفة، تعالوا نشوف كل مكان فيهم قدم إيه.

تحت شعار “اتحاد مش توحد”، ماكدونالدز مصر قدرت تقدم برنامج تدريبي لأشخاص من ذوي اضطراب طيف التوحد، بالتعاون مع الجمعية المصرية للتوحد، في مبادرة بتستقبل مجموعة متدربين جديدة في فروع القاهرة والإسكندرية، ودي المرة التانية اللي بتجدد فيها ماكدونالدز الحملة دي، بعد ما ابتدت في اليوم العالمي للتوعية بمرض التوحد. والهدف من الحملة نشر التوعية ودمج المتدربين في المجتمع بشكل إيجابي واستغلال مهاراتهم، وده نتج عنه تحسن في سلوكهم وزيادة ثقتهم وقدرتهم على الاندماج بشكل أحسن.

وفي post على فيسبوك شوفنا فيه شخص بيحكي تجربته اللطيفة مع فرع من فروع هارديز، شوفنا إن في فرع كامل من المطعم في مصر بيُدار بشكل كامل بواسطة أصحاب الهمم من الصم وضعاف السمع، في تجربة بتثبت إن “الإعاقة” هي منع الإنسان من العمل لمجرد إنه مختلف، مش إن الإنسان يكون بيواجه مرض، العميل بيحكي إن الفرع بيتم إدارته بمهنية وحرفية شديدة وضيافة دافئة وتقديم الطلبات بسرعة، وبيطلب من الناس إنهم يروحوا يكتشفوا التجربة دي ويدعموا ويشجعوا الأبطال اللي بيديروا الفرع ده، علشان ده كمان هيشجع إدارة هارديز إنهم يزودوا الاستثمار في ذوي الهمم ونشر الفكرة على نطاق أوسع لمحلات ومطاعم تانيين.

بنتمنى نشوف المبادرات دي على نطاق أوسع ومن كل المحلات والمطاعم علشان يساهموا على أرض الواقع بدمج ذوي الهمم ومساعدتهم على ده، علشان ماتبقاش مجرد شعارات بنرفعها، لكن محتاجين نطبقها على أرض الواقع.

آخر كلمة: ماتفوتوش قراءة: وزارة التضامن الاجتماعي أعلنت عن إنشاء موقع إلكتروني لتشغيل أصحاب الهمم

تعليقات
Loading...
Tweet
Share
Share
Pin