ليه شوربة العدس هي البطلة في الشتاء عند العرب؟

كل ما الدنيا تسقع شوية والبرد يشد، نلاقي التايملاين كله مليان ميمز عن إن الأمهات كلهم بيعملوا شوربة عدس علشان البرد، ومن زمان العرب وخصوصًا المصريين معروفين إنهم بيدوا العدس أهمية على سفرتهم في فصل الشتاء، بأشكال كتير، من الشوربة للفتة بكل أشكالها، وبتعتبر هي الوجبة المفضلة للمصريين في البرد، لكن ليه شوربة العدس واخدة الشهرة دي كلها؟ هنفكر مع بعض في أسباب تخليها بطلة الشتاء.

مش مكلفة

مكوناتها يقدر أي حد يشتريها بسعر كويس ومناسب لمختلف الطبقات، وممكن نعمل كميات كبيرة منها بتكاليف بسيطة جدًا، علشان كده ده بيخليها قريبة من كل الطبقات في المجتمع.

بتدي إحساس الدفا والشبع

شوربة العدس بتدي إحساس بالشبع لفترة، وكمان بتدفي الجسم وترفع درجة حرارته، علشان كده الناس بتفضّل تناولها في البرد علشان تدفيهم في السقيع اللي بنعيشه ده.

مش بتاخد وقت في إعدادها

علشان مابنبقاش مستحملين الوقفة في المطبخ في البرد، وأصلًا مش بنستحمل الخروج من تحت البطانية حتى، بنبقى عايزين وصفات سريعة، والشوربة دي مش بتاخد وقت كبير في تحضيرها، وده سبب مهم يخليها المفضّلة لينا في الأوقات دي.

قيمة غذائية

بقوليات وخضار، ببروتين وألياف طبيعية مفيدة للجسم بشكل كبير، في طبق واحد بيجمع عناصر غذائية مختلفة بتمد الجسم باحتياجاته.

سعرات حرارية قليلة

علشان كمان الشتاء بيحب الأكل وبنخرج منه وزننا زايد، ميزة شوربة العدس إنها بتحتوي على سعرات حرارية قليلة فتقدر تاكل منها زيّ ما تحب من غير ما تترعب من كمية السعرات الحرارية فيها زيّ الحلويات مثلًا اللي مش بنبطل ناكلها في الشتاء.

وصفاتها مختلفة

من أكتر من بلد، شوربة العدس وصفاتها متنوعة، من العراق وليبيا، وبنكهة لذيذة، تقدر تنوع في طبخها بأشكال مختلفة علشان ماتزهقش، وعلشان تقدّر اختلاف الأذواق بين كل شخص والتاني.

آخر كلمة: ماتفوتوش قراءة: مشروبات تبقى هي ملجأنا الوحيد في فصل الشتا

تعليقات
Loading...
Tweet
Share
Share
Pin