لتعويض قلة الترطيب في رمضان: وصفات طبيعية للعناية بالبشرة

في شهر رمضان، وبسبب ساعات الصيام الطويلة ونقص المياه في الجسم، اللي بيسبب جفاف وعدم ترطيب وده بيؤدي لمشاكل كتير في البشرة، ومابيبقاش فيه وقت لتصليح المشاكل دي في رمضان، وزيّ ما إحنا عارفين إن نقص المياه يمكن يكون سبب رئيسي في مشاكل البشرة، علشان كده، تعالوا نعرف وصفات طبيعية نقدر نهتم ببشرتنا من خلالها قبل رمضان كمان علشان نتجنب المشاكل دي على قد ما نقدر، وكمان نصايح بسيطة علشان نهتم ببشرتنا في رمضان ونعوض نقص الترطيب.

مهم جدًا نهتم بتقشير البشرة علشان نشيل الجلد الميت، ممكن تستخدمي مقشر طبيعي بطريقة بسيطة، استخدمي العسل والليمون وزيت الزيتون علشان تحصلي على مقشر طبيعي، حطيه على بشرتك لمدة ربع ساعة، وقشريه باستخدام فرشاة ومياه فاترة، واتأكدي إن درجة حرارتها مناسبة لإن المياه لو سخنة أو باردة هتضر بشرتك.. كمان ممكن تستخدمي ماسك القهوة وزيت الزيتون والسكر برضه لمدة ربع ساعة وبعد كده تغسليه بمياه دافية، في الطريقتين الوصفة سهلة بمقدار متساوي لكل المكونات.

عن: احكي

أما الترطيب، فمن أكتر الأماكن في الوش بتتأثر بالصيام وقلة الترطيب هي الشفايف، علشان كده لازم نهتم بترطيبها كمان قبل رمضان، وممكن تستخدمي خلطة القرفة وجوز الهند علشان ترطبيها، عن طريق إنك تدلكي بيهم الشفايف بقطنة لمدة 5 دقايق، هتساعدك تتخلصي من الجلد الميت وكمان هتدي لون وردي طبيعي.

وللجسم، رطبي بشرتك بأسهل ماسك ترطيب بيدي نتائج سريعة، وهو ماسك الزبادي بالعسل، اعمليه مرتين في الأسبوع وهتلاقي نتائج بشكل فارق، وكمان لترطيب البشرة ممكن تستعملي زيت جوز الهند والليمون لمدة 10 دقايق مرتين في الأسبوع. أما منطقة حوالين العيون دي كلنا عارفين إنها منطقة جلدها حساس أكتر من باقي الجسم، علشان كده ليها ماسكات خاصة، ولترطبيها بسهولة استعملي خليط الخيار والصبار، حطي خيارة وقطرات من الصبار في الخلاط واستخدميه كماسك لترطيب منطقة العيون وهيساعدك كمان في تخفيف الهالات السوداء.

آخر كلمة: كل حاجة محتاجين تعرفوها عن أنواع البشرة والماسكات المناسبة ليها.

تعليقات
Loading...
Tweet
Share
Share
Pin