لاستمرار دعم الناجين من العنف: قضايا التحرش والتنمر اللي شوفناها في 2020

مفيش اختلاف إن سنة 2020 ماكنتش سهلة بكل المقاييس.. مش بس لانتشار وباء كورونا اللي عطل حركة العالم كله، ولكن كمان لإننا شوفنا مجموعة من أبشع جرائم الاغتصاب والتحرش وللأسف قتل وبعض حملات التنمر اللي حصل على بعض أطفال النجوم. ولكن الجانب الإيجابي في الموضوع، هو إن كتير من الشباب صمموا إنهم يدوا صوتهم لأي حد وقع كضحية للتحرش سواء راجل أو ست.. وفضلوا ورا المجرمين لحد ما ياخدوا عقابهم بالقانون. ولإن إحنا مش حابين يكون ده مجرد “تريند” ويعدي.. قررنا نجمع أشهر حوادث التحرش والتنمر اللي حصلت السنة دي، علشان نجدد دعمنا ونكمل في نشر الوعي عن ضرورة كسر ثقافة “الصمت” وقد إيه مهم إن الكل يتكلم ويطالب بحقه..

قضية أحمد بسام زكي

اللي اتحرش ببنات كتير وكان بيبتزهم ويجبرهم إنهم يقابلوه بالعافية. في شهر يونيو اللي فات أكتر من 100 بنت قالوا إنه اتحرش بيهم، وده اللي عمل ثورة خلت الكل حتى الفنانات يطلعوا يتكلموا عن تجاربهم المؤلمة في التحرش وده اللي دفع النيابة إنها تصدر قرار بالقبض عليه واللي لحد النهارده محبوس على ذمة القضية..

التحرش اللفظي والتنمر ببنات شريف منير

نزل شريف منير صورة لبناته بحسن نية، علشان يلاقي كم مش طبيعي للتنمر والتحرش اللفظي ببناته، واللي بيتهموا فيه بناته، اللي بيعتبروا لسه “أطفال”، إن لبسهم مش مناسب وخادش للحياء. وده اللي خلى شريف منير يقوم بمحاضر لكل اللي كتب تعليقات مسيئة لبناته، ودعا الكل إنه ميسكتش عن حقه لو اتعرض لموقف مشابه.

قضية الفيرمونت

بعد فترة مش كبيرة في شهر أغسطس سمعنا عن قضية الفيرمونت، اللي كانت حصلت من 6 سنين، ولكن بعد قضية أحمد بسام، اتشجعت البنت دي إنها تتكلم علشان تاخد حقها، واللي حصل إنه تم تخدير بنت من قبل ستة شباب واغتصبوها وكمان صوروها.. والنهارده في 3 من الشباب المتهمين في القضية لسه محبوسين، وهرب بعضهم خارج البلاد..

تميم يونس يخرج عن صمته

حلقة الصمت المفرغة اللي بدأت تتكسر في المجتمع المصري عن قضايا التحرش شجعت الكل حتى الفنانين والرجال إنهم هما كمان يتكلموا، فقال تميم إنه تم التحرش بيه من دكتور الأسنان باسم سمير، وقال قد إيه التجربة كانت مفجعة وصادمة بالنسبة له.

مشكلة مخرج فيلم “عنها”

وقت عرض الفيلم في مهرجان القاهرة السينمائي السنة دي، اتنشرت شهادات على مدونة حكايات، بتتهم المخرج المصري إسلام العزازي بالتحرش بفتيات واغتصابهم، وسيطرت حالة من الغضب على السوشيال ميديا بتطالب بالتحقيق في الشهادات دي وبتطالب كمان باتخاذ قرار واضح من إدارة المهرجان تجاه الواقعة دي.. وفعلًا اتشال فيلم المخرج من العرض في المهرجان.

قضية فتاة ميت غمر

وفي أخر السنة دي ورغم محاولاتنا المستميتة لردع المتحرشين بكل الطرق الممكنة، بس برضه حصل تحرش جماعي ببنت في ميت غمر بحجة إن لبسها كان هو اللي ملفت وإن هي اللي عملت كده في نفسها. وللأسف جالها تهديدات كتير من محامي الشباب اللي اتقبض عليهم.. ولسه مستنيين نشوف آخر التطورات اللي هتحصل في القضية.

آخر كلمة: ماتفوتوش قراءة:” البرلمان المصري يصدر قانون جديد لحماية هوية ضحايا جرايم التحرش والاغتصاب..

تعليقات
Loading...
Tweet
Share
Share
Pin