كل اللي محتاج تعرفه عن مدينة الصويرة والأماكن السياحية فيها

المغرب بلد مليان بالأماكن السياحية الجميلة اللي قادرة تجذب السياح من كل العالم، النهاردة هنعرفكم على مدينة فيها بتتميز بالطبيعة المغربية التقليدية وكمان الطبيعة الساحلية لأنها بتعتبر من أجمل شواطئ المغرب، كمان مناسبة جدا لرحلات السياحة للعائلات.

الصويرة بتعتبر مكان مثالي لاكتشاف الحياه التقليدية القديمة للمغرب، بين الأسوار الحجرية والأبراج والشواطئ الواسعة في مدينة قديمة، بين أسوارها هتستكشف الأجواء دي وتشوف بيوتها البيضاء والشوارع الهادية والورش الحرفية البسيطة، كمان في المرفأ عندك فرصة تكتشف الأجواء الساحلية وسط القوارب الخشب المصنوعة محليا.

بالإضافة للأماكن السياحية اللي مشهورة في المدينة، ومنها الأسوار التاريخية، اللي هتنبهر بيها بمجرد دخولك المدينة، وسبب بناء الأسوار الضخمة دي إنها اتبنت كجدران دفاعية لحماية المدينة من أي هجوم، كمان هي موجودة في كذا مكان في المغرب مش بس في الصويرة، لكنها في الصويرة لها طابع خاص جميل.

كمان المدينة القديمة من أشهر الأماكن السياحية في الصويرة، وتم ادراجها في قائمة التراث العالمي لليونسكو سنة 2011، ومجرد ما تمشي فيها هتحس إنك في رحلة عبر الزمن، المدينة القديمة بتشتهر بشوارعها القديمة وبيوتها البيضاء بأبواب ملونة، كمان الأسواق فيها مشهورة الهدايا التذكارية ومنتجات محلية وحرف يدوية.

شواطئ الصويرة من أشهر مناطق الجذب السياحي في المدينة، لو بتدور على مكان مناسب للعزلة والاسترخاء، لازم تزور شواطئ الصويرة، الشواطئ في الصويرة واسعة بتمتد 10 كم لجنوب المدينة.

ومن الأنشطة السياحية اللي ممكن تقوم بيها خلال زيارتك للصويرة، حضور مهرجان كناوة للموسيقى العالمية، اللي بيقام في شهر مايو كل سنة، وبيضم عدد كبير من الموسيقيين العالميين والمحليين، وبيهتم بحضوره عدد كبير من السائحين للاستمتاع بالعروض اللي بيتم تقديمها للجمهور مجانا.

كمان لو مهتم بالرياضات المائية،تقدر بكل سهولة تمارس الرياضات دي في شواطئ الصويرة اللي بتشتهر بمواقع رئيسية لركوب الأمواج والتزلج الشراعي، لكن لو بتفضل ركوب الخيل، فشواطئ الصويرة بتقدملك فرصة رائعة لممارسة رياضتك المفضلة على الشاطئ بدل الصحراء.

86عن: pexels

آخر كلمة: لو هتزور المغرب مينفعش تفوت زيارة مدينة الصويرة.

تعليقات
Loading...
Tweet
Share
Share
Pin