قاعد في البيت زهقان؟ دي شوية حاجات ممكن تعملها في الكوارنتين

السنة دي كانت مختلفة جدًا عن كل السنين اللي فاتت، وظهر فيروس كورونا في أولها، ودلوقتي في موجة تانية من الفيروس، وفي كتير مننا قاعد في البيت معظم الوقت علشان خايف على نفسه واللي حواليه، ومع تغيير شكل الحفلات لإنها بقت أونلاين والماتشات من غير جمهور وحاجات تانية كتير.. والخبراء نصحوا إننا نفضل في البيت على قد ما نقدر لو معدناش كورونا، أو حتى لو مش ظاهر علينا أعراض، بس معظمنا مش متعود على القعدة وخايفين من الزهق، ولكن تعرف إن في حاجات كتير ممكن تعملها في البيت هتخلي الوقت مسلي أكتر وكمان مفيد؟ عشان كده جمعنالكم شوية حاجات ممكن تعملوها في الكوارنتين “الحظر” وفي نفس الوقت تبقوا مبسوطين!

  • اتعلموا لغة جديدة على الانترنت، وفي مواقع كتير ممكن تتعلم عليها لغة جديدة من غير ما تدفع ولا جنيه منها “Duolingo“، و”Babbel“.
  • ارسموا.. ولو مبتعرفوش يبقى هاتوا كتب تلوين، هي مش للأطفال بس على فكرة!
  • عيدوا ترتيب لبسكم، وأهم حاجة الشرابات.. الشرابات يا سعيد!
  • اتفرجوا على مسلسلات تركي، المسلسل الواحد ممكن يقعد معاكم للسنة الجاية حرفيًا، كورونا ممكن تخلص بس المسلسل التركي مش هيخلص! وخليكوا فاكرين إن الرومانسية دي لا تمت للواقع بصلة علشان متتصدموش لما ترجعوا للعالم الخارجي.
  • حلوا ألغاز كتير، علشان دي مفيدة للمخ.
  • العبوا رياضة وحاولوا تحافظوا على جسمكم علشان صحابكم ميتخضوش لما يشوفكم بعد الكوارنتين.
  • التأمل ثم التأمل! هيخليكوا تطّلعوا كل الطاقة السلبية وهيقلل من التوتر والاكتئاب.
  • اتفرجوا على أفلام قديمة بتحبوها وماكنش عندكم وقت تشوفوها تاني، وإحنا بنرشحلكم “شارع الحب” و “عودة أخطر رجل في العالم” و”صغيرة على الحب”.
  • شوفوا برامج طبخ.. بس المرة دي طبقوا اللي اتعلمتوه.
  • الكيك يا جماعة.. ده اللي خلانا نعدي الموجة الأولى لكورونا بسلام.
  • اتبنوا حيوانات أليفة، مش لازم تكون قطط أو كلاب، ممكن تجيب سلحفاة أو هامستر.
  • آخر حاجة ناموا كتير يا جماعة، هيجي أوقات بعد كده وهتقولوا إحنا ليه منمناش ساعتها!

آخر كلمة: القعدة في البيت ممكن تخلينا نعمل حاجات مجنونة، بس برضه متبعتوش مسدج للاكس!!

تعليقات
Loading...
Tweet
Share
Share
Pin