من رومانسية لـ “قُطة” على الريد كاربت.. أبرز لحظات مهرجان القاهرة في أول يومين

لما نيجي لمهرجانات كبيرة ومهمة زيّ مهرجان القاهرة السينمائي، ففي ناس بتستناها علشان تتفرج على الفساتين والبِدل المختلفة، وفي ناس بتبقى تركيزها الأكبر هو على المواقف الغريبة والمضحكة اللي بتحصل وتبدأ عملية نشر الكوميكس والميمز على كل اللي بيحصل من مواقف طريفة.. وساعات غريبة، وطبعًا لكتير من البنات، بيستنوا يشوفوا المواقف الرومانسية لـ “celebrity couples” علشان تبدأ شعارات “اتجوزي راجل يشجعك ويدعمك” اللي بتغرق ال news feed بتاعتنا.. والدورة دي، حصلت فيها حاجات كتير من كل اللي اتكلمنا عليه بالرغم من إن يومين بس فاتوا من أيام المهرجان، من لقطات رومانسية للميمز اللي انتشرت عن أحمد حلمي والسقا.. فتعالوا نشوف أبرز المواقف اللي حصلت..

آسر ياسين داخل السجادة الحمراء بالخوذة

لو كنا سمعنا إن حد دخل مهرجان القاهرة السينمائي بخوذة، أكيد كنا هنستغرب، ولكن لما نعرف إن الفنان آسر ياسين هو صاحب الموقف ده، أكيد أي شعور بالدهشة هيختفي! لما ييجي الموضوع لأفكار جديدة لكيفية جذب كل الأضواء عليه وإضافة روح مرحة، “الشايب” آسر ياسين أفكاره مابتنتهيش أبدًا! مرور آسر ياسين على الريد كاربت دايمًا هيكون مختلف.. ودايمًا هيخلي أي مهرجان روحة أحلى وطاقته الإيجابية في كل حتة.

كريم فهمي يرفض التصوير من غير زوجته

كريم فهمي يتمسك بزوجته ويحرج أحد المصورين في مهرجان القاهرة السينمائي

كريم فهمي يتمسك بزوجته ويحرج أحد المصورين في مهرجان القاهرة السينمائي

Posted by ‎القاهرة 24‎ on Wednesday, December 2, 2020

من المعروف إن كريم فهمي من أبرز الممثلين الشباب اللي بيتبص ليهم على إنه مثال للراجل الرومانسي والشرقي في نفس الوقت.. فبجانب دور مراد اللي عمله في مسلسل رمضان اللي فات “ونحب تاني ليه” واللي سلط الضوء على الجانب الرومانسي لكريم، فكمان على الصعيد الشخصي فهو رومانسي أكتر كمان مع زوجته دانيا! فخلال وقوفهم للتصوير على السجادة الحمراء، طلب أحد المصورين من كريم إنه يقف بعيد عن مراته لالتقاط صور بمفرده.. ولكنه رفض وتمسك بيها لما حاولت تمشي علشان تسيبله مساحة التصوير لوحده.. طبعًا مش محتاجين نشرحلكم الموقف ده البنات كان رد فعلها إيه عليه.. معروفة!

قطة تخطف الأضواء وتكتسح السجادة الحمراء

لما نتفرج على السجادة الحمراء.. بنستنى الفنانين المفضلين بالنسبة لينا علشان نتفرج على شياكتهم ونعمل حوار بسيط معاهم لو أمكن، ولكن إن قطة هي اللي تأخد الأضواء وهي اللي تتصور.. دي جديدة!

كوميكس أحمد حلمي والسقا

فازت الفنانة منى زكي بجائزة فاتن حمامة، فجابت الكاميرات حلمي وهو بيسقف بحرقة لزوجته اللي فازت بجائزة كبيرة.. وكمان لما طلعت زوجة أحمد السقا، مها الصغير كمذيعة للمهرجان، برضه اتسلط الضوء على أحمد السقا وهو فرحان بزوجته وبيسقفلها.. لحد هنا كل ده طبيعي.. ولكن ظهر بعض المنشورات على الفيسبوك اللي بتضمن كلام “الراجل اللي بجد هو اللي بيدعم زوجته ويشجعها”، وجيه الرد على الفريق ده بمجموعة من الميمز اللي محتواها إزاي الشعب بيأفور وبيضخم من أي لافتة بسيطة وطبيعية.. أصل كان إيه تاني ممكن يعملوة غير التسقيف؟ كنتوا واخدين صف مين في الموضوع ده؟

آخر كلمة: ماتفوتوش قراءة: مين المخرجين العرب المشاركين في مهرجان القاهرة السينمائي 2020؟

تعليقات
Loading...