في ذكرى وفاة الفنانة تحية كاريوكا، تعرف على مسيرتها الفنية

إتولدت الفنانة تحية كاريوكا باسم بدوية تحية محمد علي النيداني كريم، سنة 1919، في محافظة الإسماعيلية بمصر، هي ممثلة وراقصة شرقية، بدأت في ممارسة الرقص والتمثيل والغنا من سن صغير كموهبة، وهربت من أخوها اللي كان بيسئ معاملتها بشدة، وراحت القاهرة، واكتشفتها الراقصة محاسن، وبعد كده انضمت لفرقة بديعة مصابني، اللي استعانت بيها في السينما والمسرح.

تعتبر تحية كاريوكا من أشهر الراقصات اللي دخلوا عالم السينما، كانت معروفة بشخصيتها القوية والجريئة، وإنها مابتخافش من حاجة أو من حد، وقدرت تصنع اسم لنفسها مايتنسيش مهما عدت السنين، وتعتبر كمان من أهم علامات السينما العربية.

وفي سنة 1940، بدأت شهرتها لما قدمت رقصة الكاريوكا العالمية في عروض سليمان نجيب اللي ساعدها في بدأ مسيرتها الفنية في عالم السينما، ومن هنا جِه اسم شهرتها. وبدأت تشترك في أفلام، وكان أول فيلم لها في سنة 1935، وهو فيلم “دكتور فرحات”.

عن: falsoo

اعتزلت كاريوكا الرقص في الخمسينات علشان تتفرغ للتمثيل، وقدمت مسلسلات ومسرحيات كتير، زي “روبابيكيا”، “الأوبك”، “البغل في الإبريق”، “حارة الشرفا”، “يحيا الوفد”، و”شفيقة القبطية”. ومن أشهر أفلامها “لعبة الست” مع نجيب الريحاني، و”حماتي قنبلة ذرية” مع اسماعيل ياسين، وماري منيب، و”أم العروسة” مع عماد حمدي، و”منديل الحلو” مع محمود المليجي، و”خلي بالك من زوزو” مع سعاد حسني، وحسين فهمي من إخراج صلاح جاهين.

عن: elcinema

فيلمها الأشهر “شباب امرأة” سنة 1956 للمخرج الكبير صلاح أبو سيف، شارك في مهرجان كان السينمائي العالمي، في نفس السنة اللي شهدت مصر فيها العدوان الثلاثي، فأصرت تحية كاريوكا إنها تحضر المهرجان بالملاية اللف ولبس شخصية “شفاعات” البطلة، علشان تعكس شخصية البنت المصرية، فانبهر المصورون بيها، ونسيوا باقي الفنانين العالميين، والتقطوا لها صور كتير. واتعرض عليها تمثل في فيلم من انتاج هوليوود سنة 1967، اللي كان ممكن يغيرلها حياتها الفنية، ولكنها رفضته لأن والدتها كانت مريضة.

عن: elcinema

كان لتحية كاريوكا كمان نشاط سياسي من سنة 1948، فكانت بتساعد الثوار ضد الإحتلال الإنجليزي، وكانت مشاركة في المقاومة ضد العدوان الثلاثي. واتقبض عليها مرة بتهمة قلب نظام الحكم، ومرة لإنتقادها نظام الرئيس السابق جمال عبد الناصر.

تزوجت تحية كذا مرة، وكل مرة فترة الزواج ماكانتش بتدوم بسبب خلافات بينها وبين أزواجها، ومنهم رشدي أباظة، ومحرم فؤاد، وأحمد ذو الفقار صبري، وفايز حلاوة، وفطين عبد الوهاب. ولم تنجب تحية كاريوكا أي أطفال، فاتبنت بنت وهي عندها 70 سنة، وواحدة صاحبتها قامت برعاية الطفلة بعد وفاة الفنانة القديرة في سنة 1999 عن عمر يناهز 80 سنة بسبب جلطة رئوية.

عن: e7kky

آخر كلمة: تحية كاريوكا سايبة طابعها لحد دلوقتي في السينما العربية.. شاركونا ايه أكتر عمل بتحبوه ليها.

تعليقات
Loading...
Tweet
Share
Share
Pin