في ذكرى ميلاد الراحل ممدوح عبد العليم.. تعالوا نفتكر أهم أعماله الفنية

الفنان ممدوح عبد العليم هو واحد من أعظم الفنانين اللي مثلوا في مصر، وليه أعماله الفنية الحلوة، وفي ذكرى ميلاده الـ65 النهارده، وتقديرًا للأعمال اللي متعنا بيها خلال مشواره الفني.. قررنا نحتفل بيه على طريقتنا الخاصة ونفتكر معاكم أبرز أعماله في السينما والتلفزيون.

فيلم العذراء والشعر الأبيض

عن: Media

ظهر عبد العليم في أول دور على شاشة السينما سنة 1983 لما جسد شخصية “عادل” اللي كان في سن صغير وقتها وبيحب بثينة اللي جسدتها الفنانة الكبيرة شريهان.. ولفت عبد العليم وقتها نظر الكُل بوسامته وأدائه المتميز رغم صغر سنه.

مسلسل الحب وأشياء أخرى

عن: Pinterest

قصة الحب اللي جمعت بين عبد العليم في دور سامح مدرس الموسيقى الفقير، وهند البنت الغنية اللي بيقرروا يتجوزوا رغم إن أهلهم مش موافقين، وبيكتشفوا بعد الجواز إن الحب لوحده مش كفاية.

مسلسل الضوء الشارد

المسلسل ده بيعتبر من الأعمال الفارقة في التاريخ الفني للراحل ممدوح عبد العليم، ونجح نجاح كبير، وقدر بعد كده ممدوح إنه يكسب قاعدة جماهيرية كبيرة.

فيلم بطل من ورق

في تاني عمل ليه مع الفنانة آثار الحكيم، ظهر عبد العليم في شخصية رامي الساذجة، اللي بيكتب سيناريو فيلم جريمة متكامل، كمحاولة منه إنه يأخد فلوس في المقابل، ولكن بيقع السيناريو في إيد كاتب بالآلة الكاتبة اللي بيتضحلنا إنه مضطرب نفسيًا، وبيحاول يطبق أحداث الورق في الحقيقة.

مسلسل ليالي الحلمية

مفيش شك إن مسلسل ليالي الحلمية بجميع أجزائه ميتنسيش، ودور عبد العليم اللي جسد فيه “علي سليم البدري” كان من أهم الشخصيات اللي جسدها واللي قدر بيها يروح لمكانة تانية خالص عند الجمهور.

مسلسل المصراوية الجزء الثاني

في الجزء التاني من مسلسل المصراوية، جسد عبد العليم دور العمدة فتح الله اللي بتزيد عليه الضغوط بعد ما حماده وجعفر اتقتلوا، وبشكل درامي أبدع الراحل في نقل وشرح المراحل اللي بيمر بيها المجتمع المصري خلال الأحداث.

مسلسل السيدة الأولى

عن: Media

المسلسل ده كان آخر أعمال الراحل ممدوح عبد العليم، اللي رغم إنه منجحش بشكل كبير، بس الكُل كان مستمتع إنه يشوف عبد العليم اللي بيضيف لأي عمل بيشترك فيه.. وكمان المسلسل ليه قيمة كبيرة، لأنه آخر عمل للفنان الراحل.

آخر كلمة: ماتفوتوش قراءة: بعد نجاح “ما وراء الطبيعة”.. فنانين اتشهروا وعلقوا في ذاكرة الناس من المسلسل.

تعليقات
Loading...
Tweet
Share
Share
Pin