في حوارنا مع بطلة روسيا للكاراتيه: بحلم بتمثيل مصر في البطولات العالمية

الطفلة المصرية تيا حمدي، ملكة جمال أطفال روسيا 2020، اللي بقت صورها في كل حتة في روسيا وبتستعد حاليًا لمسابقة ملكة جمال أطفال العالم، حققت كمان إنجاز جديد في رياضة مهمة وعالمية، وفازت بالمركز الأول في بطولة روسيا للكاراتيه، تيا عندها 5 سنين، اتولدت في شرم الشيخ لأب مصري وأم روسية، وهي دلوقتي عايشة في روسيا، وبعد فوزها بالبطولة كرمتها الحكومة الروسية.

وإحنا في سكوب إمباير عملنا حوار مع تيا حمدي، وقالتلنا إنها ابتدت طريقها في الكاراتيه من وقت قصير من سبتمبر 2020، ومع ذلك قدرت تحقق لقب وتفوز بالبطولة الروسية، اللي تُعتبر أول بطولة ليها، ومنافستها في النهائي كانت أكبر منها بأكتر من سنتين، وتيا بتدرب في مدرسة المواهب الروسية اللي التحقت بيها لتنمية مواهبها المختلفة، رغم إنها في البداية كانت نفسها تلعب بوكس، لكنها لقت إنها مش مناسبة ليها، فاتجهت للكاراتيه، وكمان للـ MMA، وبتحلم تيا إنها تمثل مصر في بطولات عالمية للكاراتيه لكن بتقول إنه ده هيحتاج وقت وتدريب كتير علشان تقدر توصله لكنها بتحلم بده.

الطفلة متعددة المواهب، فهي ملكة جمال وبطلة رياضية ونجمة إعلانات وكمان ممثلة بتجهز كمان لفيلم، وبيتعاقد معاها شركات أزياء للأطفال علشان تكون واجهة إعلاناتهم، تيا بقت نجمة في روسيا علشان متفوقة في كل المجالات دي، فهي تفوقت على نص مليون طفلة روسية وكسبت ملكة جمال أطفال روسيا، والمسابقة دي بيهتم بيها المجتمع الروسي جدًا، وعلشان كده تيا حققت شهرة كبيرة هناك، رغم إنها مولودة في مصر ووالدها بيشتغل في شرم الشيخ، وهي عايشة بين مصر وروسيا.

آخر كلمة: ماتفوتوش قراءة: بعد الفوز ببطولة تشارلستون للتنس ودخولها التاريخ.. مين هي البطلة ميار شريف.

تعليقات
Loading...
Tweet
Share
Share
Pin