في حلقة Roam Egypt الجديدة: أماكن لازم تروحها في مرسى علم

مرسى علم من أكتر الأماكن اللي ليها سحر خاص، “مالديف مصر” زيّ ما بيتقال عليها، في الغطس تعتبر من أحلى الوجهات في العالم كله لمحبي الغطس، وكمان لو بتحب الاستجمام والاسترخاء، مرسى علم هتكون اختيار مثالي ليك، لإن طبيعتها خاصة بين الطبيعة الجبلية وبحرها النقي، وفي الحلقة الجديدة لـ Roam Egypt بيعرفونا أماكن ماينفعش نفوّت زيارتها في مرسى علم، زيّ ما اتعودنا في حلقاتهم، بيقدموا ده بشكل مختلف وجديد، تعالوا نعرف إيه الأماكن دي.

النيزك

3 ساعات بالعربية من جنوب الغردقة، أو 20 دقيقة من بورتو غالب، وتبقى في واحد من أجمل الأماكن اللي موجودة في مرسى علم، منظر طبيعي يخطف العين، مع أمواج البحر ولمعتها، لكن ليه اسمه النيزك؟ لإنه زيّ حمام سباحة مصنوع من تشكيل صخري فريد من نوعه، علشان كده في اعتقاد إنه اتشكل من خلال نيزك ضرب الساحل.

الفنستون

بجو لطيف ومعتدل طول السنة، وشواطئ جميلة، وأسماك ملونة، وشعاب مرجانية ومياه نقية وصافية، الفنستون بكل مميزاتها دي بتقدر تجذب الزوار علشان يعيشوا تجربة أجازة ماتتنسيش ومفيش زيّها.

وادي الجمال

مساحة كبيرة من الأرض والمياه الساحلية موجودة في جنوب مرسى علم، وفي أنواع كتير من البيئات المتنوعة، وفي كمان أنواع مختلفة من الطيور والحيوانات، وعدد من الطيور المهددة بالانقراض، علشان كده تم تصنيفه عالميًا ضمن أجمل الشواطئ، وبقى محمية طبيعية، وعلشان بيجمع بين بيئات متنوعة هتشوف فيه حياة برية نادرة، وهتعيش تجربة غوص مميزة.

شرم اللولي

“حتة من الجنة” زيّ ما السياح بيسموه، وحصل على المركز الثالث ضمن أحلى الشواطئ في الشرق الأوسط، موجود في محمية وادي الجمال، وبيطل على سلسلة جبال بمنظر طبيعي مالوش مثيل، من نقاء المياه بتقدر تشوف قاع البحر من أعماق بعيدة، ده غير الشاطئ الرملي المميز فيه، وأنواع مختلفة من الأسماك، والشعاب المرجانية، كل ده بيخلي شرم اللولي وجهة ماينفعش تفوّتها.

وادي قلعان

واحد من أجمل الشواطئ على البحر الأحمر، المياه فيه بتتميز بالدفء ومناسبة للي بيعانوا من أمراض روماتيزمية، كمان تقدر تروح لشجرة المانجروف المشهورة هناك، واللي بعدها منظر مدهش، البحر الواسع، مع نقاء المياه، وتقدر مع كل ده تستمتع بالقهوة البدوية الأصيلة في الخيمة القريبة للبحيرة، لإن الأجواء هناك كمان مناسبة للتخييم.

محمية صمداي (بيت الدلافين)

محمية طبيعية للدلافين، وتعتبر أكبر محمية خاصة بالدلافين في العالم، بتضم أكتر من 5000 دولفين، اللي يعتبر من أكتر الكائنات اللطيفة، هتستمتع هناك برحلة غوص مش هتنساها، بين الشعاب المرجانية والدلافين.

آخر كلمة: ماتفوتوش قراءة: بعد حلقة Roam Egypt الجديدة: أحلى 9 حاجات نعملها في الفيوم بطعم مختلف

تعليقات
Loading...
Tweet
Share
Share
Pin