تحديدًا في الوقت ده من السنة، والجو ابتدى يبقى حلو ومش حر، وداخلين على الشتاء، بيكون وقت مميز للرحلات والسفر لسيناء وسانت كاترين بالأخص، اللي تعتبر من أجمل أماكن مصر كلها، وتجرب فيها حاجات مختلفة وجديدة وتشوف “سحر الطبيعة” فعلًا مش مجرد كلمة بتتقال في الكتب وخلاص، ومن أشهر الأنشطة اللي بتتعمل في سانت كاترين هي تسلق الجبال والسفاري والمشي لمسافات طويلة وسط الجبال، وعلشان تستمتع بالتجربة دي، هنقولك على أجمل أماكن للهايكنج في سانت كاترين.
جبل البنات
بقصة أسطورية لاسمه، بيحكيها واحد من خبراء السياحة في المنطقة، قال إن تم تسميته بجبل البنات لإن فيه أسطورة بتقول إن فيه 3 بنات أخوات ربطوا ضفايرهم ببعض وتسلقوا الجبل وصعدوا لقمته، لكنهم انتحروا لإن أهلهم كانوا عايزين يجوزوهم بالعافية، فاقترن الجبل بقصتهم اللي تم اعتبارها إعلان لحقوق المرأة.
علشان تتسلق جبل البنات، هتحتاج حوالي 3 ساعات طلوع ونزول، والطريق وصفه الخبير: من تجمع بدوي الشيخ عواد ومنه إلي تجمع بدوي أبوسيلة ومنه الي وادي النقرة ويصعد بعدها السياح جبل الهجيج ومنه الي تجمع بدوي المروة ومنه الي أبوزتونة لحد ما توصل لجبل البنات.
جبل باب الدنيا
طريق طويل بيستغرق يوم كامل، نهايته بتوديك لبوابة جبلية سحرية بيقولوا عليها إنها امتداد للعالم الكبير أو “الدنيا” زي ما اتسمى الجبل ده، من أحلى وأعلى جبال سانت كاترين، بيبلغ ارتفاعه حوالي 2300 متر، وعلشان توصل للجبل، لازم تمر الأول على عدد من الأودية، منها وادي جيفا، وعيون المياه، اللي صممها أهل المكان على طبقتين، الأولى لحيوانات الصحراء، والتانية يستخدمها السكان. بعدها تستمر في مسيرتك لوادي طبوق، لرحيبة ندا.
جبل كاترين
أعلى قمة جبلية في مصر، بارتفاع 2650 متر، تسلق الجبل ده من أمتع المغامرات اللي ممكن تقوم بيها، لكنه بيتطلب اجراءات وقائية لسلامتك، كمان درجة الحرارة بتوصل لتحت الصفر في معظم فصل الشتاء، لكنها مغامرة وتجربة تستحق. متسلق الجبال شريف حافظ قال لـ “مصراوي” إن أفضل فترات التحرك بتكون عند شروق الشمس مع أول ضوء في النهار، لإن درجة الحرارة في الوقت ده بتكون معتدلة فيكون الجسم قادر على التحمل، وكمان علشان الجسم مايفقدش سوائل كتيرة، كمان قال: “ولأنك تكون بين أحضان الطبيعة المعروفة بتقلباتها وعواصفها ورياحها الشديدة، عليك اتباع تعليمات ونصائح أساسية لضمان السلامة الشخصية عند الصعود خاصة المبتدئين، ويفضل صحبة محترفي التسلق أو من لهم خبرة بدروب الجبال وممتلكي مهارات البقاء”.
جبل الطربوش
رحلة الوصول إليه تعتبر الأطول، لإنها بتستغرق حوالي 5 أيام، بيقيم من خلالها السائحين داخل الجبال لكن طبعًا برفقة خبير في الدروب الجبلية الوعرة وبالاستعانة بالخرائط علشان يعرف يرجع من نفس طريق الذهاب، الجبل ارتفاعه 2100 متر، ويعتبر واحد من أهم مزارات سانت كاترين، وعلشان توصله فيه طريقين، الأول من تجمع بدوي الشيخ عواد جنوب شرق سانت كاترين ومنه الي تجمع البريقة ثم الي وادي رفيد ومنه الي قمة جبل الطربوش، أما الطريق التاني من تجمع بدو أبو جيفة الزواتين، ومنه الي وادي جبال ومنه الي وادي التلعة الكبيرة ومنه إلي أم صيفرات ثم جبل أبو رجوم ومنه إلي جبل الطربوش.
جبل موسى
يعتبر موقع مقدس للأديان المختلفة، معروف بأسماء تانية زي جبل الطور أو جبل سيناء، ارتفاعه حوالي 2285 متر، لكن تسلقه مش سهل بسبب منحدراته وانحداره, القيمة الدينية للجبل ده بتتمثل في إنه مش مجرد تسلق عادي، لكنه تتبع لخطى سيدنا موسى، مكان ما تلقى الوصايا الإلهية من الله. الزوار بيختاروا أفضل وقت لتسلقه، عند شروق الشمس أو غروبها، وفي الحالتين، المشهد بيكون من أوروع ما يكون، ويستحق التجربة الصعبة في التسلق.